اسماعیل هنیه مسلمان، هوښیار او مدبر فلسطینی مشر و

د افغانستان اسلامي امارت د چارشنبې پر ورځ (د اسد ۱۰) د حماس د سیاسي مشر اسماعیل هنیه پر مړینې غبرګون وښود او د هغه مړینه یې یوه لویه ضایعه یاه کړه.

د افغانستان اسلامي امارت ویاند د فلسطین اسلامي غورځنګ(حماس) د سیاسي مشر اسماعيل هنيه د شهادت په اړه د خواشینۍ څرګندونو تر څنګ ویلي، چې دا مسلمان، هوښیار او مدبر فلسطیني تېره شپه په تهران کې وژل شوی دی.

د اسلامي امارت په خبرپانه کې راغلي؛ هغه د فلسطینیانو په بریالۍ مبارزه او جهاد کې سترې قربانۍ ورکړې او دادی په همدې لاره کې یې خپل نذر پوره کړ او خپلو لارویانو ته یې د مقاومت، سرښندنې، زغم، مبارزې او په همدې لار کې د عملي قربانیو درس پرېښود.

ذبیح الله مجاهد د نوموړي د شهادت له کبله د هغه دردېدلې مجاهدې کورنۍ، د حماس مشرتابه او په سنګر کې د اسرائیلي یرغلګرو ځواکونو پر وړاندې مجاهدینو ته تسلیت څرګند کړی دی.

د افغانستان اسلامي امارت د فلسطين پر سپېڅلي خاورې د اسرائیلو یرغل، وحشتونه، بمبارډ او د فلسطیني مسلمانانو نسل وژنه پر کلکو ټکو غندي او کړنې یې بشري جنايت بولي.

د افغانستان اسلامي امارت له اسلامي او عربي نړۍ غوښتنه کړې، چې په سیمه کې د اسرائیلي ځواکونو یرغل او وحشتونو په مخنیوي کې خپلې هڅې ونه‌سپموي.

ویل کیږي، چې که د اسرائیلي ځواکونو د روانې کرکې، جنګ او وحشت مخه ونه‌نیول شي؛ له شک پرته به سیمه او د سیمې هېوادونه نور هم بې‌ثباته کړي.

اړوند خبرونه:

حماس ځواکونو د حماس د مشر له وژل کېدو خبر ورکړ

امیر خان متقي له هنیه سره په ټیلیفوني خبرو کې د حماس مبارزه وستایله