سیمه ییز خبرونه
افغانان به د خپلو پولو د ساتنې لپاره ډاډمن گامونه پورته كړي
د ننگرهار په گوشته كې د افغان او پاكستانيو ځواكونو له نښتې وروسته، چې په كې يو افغان سرتېرى وژل شوى؛ ويل كيږي، چې سيمې ته د پاكستانيو ځواكونو د احتمالي بريدونو ځواب په موخه نور افغان امنيتي ځواكونه رسيدلي او هم يې د افغان ولسمشر غبرگون را پارولى دى.
افغان ولسمشر خبردارى وركوي، چې افغانستان به د خپلو پولو د ساتلو لپاره هر ډول گام پورته كړي او افغان حكومت به هيڅ كله هم د افغانستان په خاوره كې پردي تاسيسات او دروازې ونه زغمي.
د ولسي جرگې غړى همايون همايون وايي:
د افغان او پاكستانيو ځواكونو تر منځ د ننگرهار د گوشتې په وروستۍ نښته كې د افغان امنيتي ځواكونو د دريځ د پياوړتيا او ميړانې ښكارندوى كوي.
سياسي كارپوه احمد سعيدي وايي، چې افغان امنيتي ځواكونو له هغې وروسته پر پاكستانيو ځواكونو بريد وكړ، چې دغو ځواكونو د افغانستان پر خاوره د راكټي بريدونو تر څنگ يو شمېر پوځي تاسيسات او دروازه د افغانستان په خاروه كې جوړكړل.
دا په داسې حال كې ده، چې ولسمشر حامد كرزي د افغانستان پر خپلواكۍ او ترقۍ خپل ټينگار څرگند كړى دى.