سیمه ییز خبرونه
افغان حکومت د ملګرو ملتونو هغه رپوټ رد کړ،چې د كوكنارو په كښت كې یی زياتوالى ښودلی وو
افغان حكومت د ملګرو ملتونو د نشه يې توكو سره د مبارزې د ادارې هغه رپوټ رد كړ، چې په هلمند ولايت كې د كوكنارو په كښت كې یی درې سلنه زياتوالى ښودلی وو. د دغه رپوت له مخې په تېرو شپږو كلونو كې په هلمند كې درې سلنه د كوكنارو كښت زيات شوى دى.
ملګرو ملتونو په خپل دې رپوټ كې ويلي، داسې برېښي، چې د افغانستان د كوكنارو نيمايي برخه هلمند كې كرل كېږي.
د ملګرو ملتونو له نشه يي توكو او جرمونو سره د مبارزې ادارې په هلمند كې د كوكنارو پر كر اندېښنه ښودلې او ويلي يې دي ممكن د هلمند تر څنګ د افغانستان په كچه د كوكنارو كر زيات شي.
خو د افغانستان د نشه يي توكو پر وړاندې د مبارزې وزارت مرستيال محمد ابراهيم ازهر، د ملګروملتونو دا رپوټ رد كړى دى.
كه څه هم تخار او ننګرهار د افغان دولت له لوري د كوكنارو له كر څخه پاك اعلام شوي، خو د ملګرو ملتونو په رپوټ كې په دې ولايتونو كې د كوكنارو د كر د زياتوالي خبر وركړل شوى دى.
په دغه رپوټ كې نا امنۍ او د كوكنارو لپاره د بديل كښت په رامېنځ ته كولو كې نا كامي د كوكنارو د كښت او د نشه يې توكو د قاچاق په برخه كې د زياتوالي اصلي لامل بلل شوى دى.
په همدې حال كې د نشه يې توكو سره د مبارزې وزارت زیاتوي، په افغانستان كې شاوخوا يو عشاريه شپږ ميليونه كرونګر د نشه يې توكو په كر، توليد او قاچاق كې ښكېل دي، چې د نشه يې توكو سره د مبارزې پوليس د دوى د مهارولو لپاره كافي ظرفيت نه لري.