سوداگري
افغان پانګوال نړیوالو مارکیټونو ته لاسرسی نلري
نږدې دوه اوونۍ کیږی، چې امریکا د افغانستان له بانکونو او خصوصي سګتوره بندیزونه لرې کړي؛ خو افغان پانګوال اوس هم ندي توانیدلي، چې نړیوالو مارکیټونو ته لاسرسی پيدا کړي.
د افغانستان د خصوصي سکتورغړي وایي؛ اوس هم توانیدلي ندي، چې د افغانستان سوداګریزې اړیکې د نړۍ له مارکیټونو سره تنظيم کړي.
دوی څرګندوي؛ نږدې دوه اوونۍ کیږي، چې امریکا د افغانستان پر اقتصادي نظام د بندیزونو د لرې کولو خبر خپور کړ؛ خو افغان سوداګر او پانګوال اوس هم د پخوا په څېر د پيسو د لېږد له ستونزو سره مخ دي.
د خصوصي سکتور غړيو په ډاګه کړې؛ که د پيسو د لیږد ستونزه حل نشي، ښایي د افغانستان اقتصادي ماشین له سقوط سره مخ شي.
د صنایعو او کانونو خونې مشر شېرباز کمین زاده وایي: اوس هم د پخوا پڅېر په ستونزه کې یوو. ما له امریکا څخه د ۶۰ زره ډالرو پر ارزښت مال غوښتی؛ خو پيسې نشم استولی امریکایان باید له افغانانو سره نور ظلم ونکړي.
د افغانستان د سوداګرۍ او پانګونې خونې مسوولینو هم ویلي، چې د خپلو سوداګریزو توکو د پيسو د لېږد په برخه کې له ستونزو سره مخ دي.
دوی له د افغانستان بانک څخه د دې ستونزې د حل غوښتنه کوي۔
د سوداګرۍ او پانګونې خونې غړی خان جان الکوزی وایي: مونږ له د افغانستان بانک څخه هیله لرو، چې د خصوصي سکتور د بانکي ستونزو د اوارۍ لپاره خپلې هڅې ګړندۍ تر سره کړي، چې په مارکیت کې کوم بحران رامنځته نشي.
د افغانستان بانک چارواکي هم د خصوصي سکتور د بانکي ستونزو د اوارولو له هڅو خبره کوي او زیاتوي؛ د افغانستان بانک رهبري غواړي، چې اوسنۍ ستونزې ژر حل کړي.
د افغانستان بانک ویاند محمد صابر مومند وایي: مونږ په دې هڅه کې یوو، چې وکولی شو د هېواد د خصوصي سکتور او تولو هېوادالو ته د پخوا پڅېر بانکي خدمتونه وړاندې کړو او دا ستونزه به ژر حل شي.
د اقتصادي چارو کار پوهان هم د افغانستان بانک له رهبرۍ غواړي، چې د شته ستونزو د اوارولو لپاره هڅې ګوندۍ کړي، چې مارکیت د توکو له کمي وژغورل شي.