تازه خبرونه
افغان پلاوی له پاکستان سره د خبرو لپاره چین ته روان شو
د افغان پلاوي مشري د بهرنیو چارو وزارت د دفتر رییس محبالله وثیق کوي.
سرچینو د چارشنبې پر ورځ(د وري دولسمه ) آریانانیوز ته ویلي، چې د افغانستان اسلامي امارت یو پلاوی له پاکستاني چارواکو سره د خبرو اترو لپاره د چین ارومچي ښار ته سفر کړی دی.
د افغان پلاوي مشري د بهرنیو چارو وزارت د دفتر رییس محبالله وثیق کوي.
په پلاوي کې د دفاع او کورنیو چارو وزارت او استخباراتو عمومي ریاست د بهرنیو اړیکو رییسان ګډون لري.
د افغانستان په چارو کې د پاکستان ځانګړی استازی محمد صادق خان د پاکستاني پلاوي مشري کوي.
دا په داسې حال کې ده، چې د افغانستان او پاکستان ترمنځ له وروستیو نښتو دواړو خواوو ته درانده ځاني او مالي زیانونه اوښتي دي.
اسلامآباد اسلامي امارت د هغو وسلهوالو پر ملاتړ او پناه ورکولو تورنوي، چې په پاکستان کې بریدونه کوي.
کابل د اسلامآباد دا ادعا تل رد کړې او څرګندوي، چې د پاکستان روانه ناامني د دوی کورنۍ ستونزه ده.