تازه خبرونه
امريکا به نور په افغانستان کې خپلې ډپلوماټیکې هڅې د قطري حکومت له لارې ترسره کوي
د رویټرز خبري سرچینې د راپورله مخې؛ امریکا او قطر هوکړه کړې، چې قطر به په کابل کې د واشنګټن د ډیپلوماټیکو ګټو د ساتونکي په توګه هڅې کوي.
امریکا او قطر په واشنګټن کې یو سټراټیژیک تړون لاسلیک کړی دی.
رويټرز د امریکا بهرنیو چارو د وزیر انټوني بلينکن د څرګندونو له مخې په ډاګه کړې؛ په کابل کې به د قطر سفارت دننه یوه څانګه د امریکا کونسلي خدمتونه، د امنیت ارزونه او د امریکا د ډیپلوماټیکو ودانیو څارنه کوي.
قطر هم موافقه کړې ده، چې په کابل کې به د امریکا استازیتوب کوي.
بلینکن ویلي، قطر د سیمې د ثبات په ټینګولو کې مهم ونډوال دی.
له دې مخکې د ال ثاني په مشرۍ یو قطري پلاوی واشنګټن ته تللی و، چې پدې اړه خبرې وکړي.
د قطر د بهرنیو چارو وزیر ال ثاني ویلي؛ مونږ د افغانستان د ثبات او د دې هېواد د خلکو د امنیت او هوساینې په برخه کې مرستې ته ژمن یو.
هغه زیاته کړې، چې د قطر لومړیتوب د افغانستان خلکو ته د بشري مرستو رسول دي.
د یادونې ده، چې امریکا په ایران، سوریې او شمالي کوریا کې سفارت نلري؛ خو نور هېوادونه یې استازیتوب کوي.