تازه خبرونه
بنیاد بیات په لوګر ولایت کې لسګونه اړمنو کورنیو ته ژمنۍ مرستې ووېشلې
بنیاد بیات مسوولینو په لوګر ولایت کې پر سلګونو اړمنو کورنیو د خوراکي او غیر خوراکي توکو دوېشلو پر مهال ويلي، چې په دغو ژمنيو مرستو کې اوړه، غوړي، وريجې او جامې شاملې دي.
د دوى د څرګندونو له مخې؛ په دغه ولايت کې یادې مرستې له یوې ترسره شوې سروې وروسته پر مستحقو او اړمنو کورنيو ووېشل شوې.
د دغه بنسټ مسوولینو ټینګار کړی، چې د هېواد په نورو ولایتونو کې به هم له اړو کسانو سره مرستې وشي.
د بنیاد بیات استازي سید میرویس هاشمي ویلي: د بیات بنیاد د بشري مرستو په لړ کې نن وکولی شول، چې په لوګر ولایت کې یو شمېر مستحق کسان، چې اوړه، وریجې، غوړي، جمپرونه، کمبلې او جرابې په کې دي؛ تر پوښښ لاندې راولي.
له بلې خوا هغه کورنۍ، چې له دغو مرستو برخمنې شوي له نورو خيريه بنسټونو غوښتنه کوي، چې په دې سختو شرايطو کې له اړمنو سره خلکو سره مرسته وکړي.
یوه مرسته اخیستونکي ویلي: مونږ له بنیاد بیات څخه مننه کوو، چې مونږ ته یې اوړه، غوړي، وریجې، کمبلې او ژمنۍ جرابې راکړې.
د يادونې ده، چې بنیاد بيات په هېواد کې د مرستو د وېش تر څنګ هېوادوالو ته نه یوازې د څښاک پاکو اوبو د برابرولو لپاره ژورې څاګانې کېندلي، بلکې د ښوونځيو، روغتيايي مرکزونو، سپورټي ډګرونو او جوماتونو په جوړولو کې یې هم ډېر کار کړی دی.