بيات بنياد له ښوونكيو څخه د ملاتړ مراسم تر سره كړل

په دغه غونډه كې د بيات بنياد رييس انجنيراحسان الله بيات ، د پوهنې وزارت مسوولينو او د سيدال ناصري د نجونو عالي ليسې ښوونكيو برخه درلوده.

په دغو مراسمو كې پرښوونكيو يوه اندازه خوراكي توكي او پر زده كوونكيو درسي مواد ووېشل شول.

بيات بنياد د رامنځته كېدو راهيسي كوښښ كوي، چې په هېواد كې د پوهنې له بهير سره مرسته او همكاري وكړي او خلك پوهنې ته وهڅوي.

بيات بنياد هركال په دغه برخه كې خپله ځانگړې پانگه لگوي او ښوونكي د ورځې په وياړ هركال ځانگړي مراسم جوړوي.

په همدې پلمه د بيات بنياد رييس انجنير احسان بيات د شنبې په ورځ(د تلې ۱۶) د  كابل په يوولسمه ناحيه كې له سيدال ناصري د نجونوعالي ليسي څخه ليدنه وكړه او پرښوونكيو او زده كوونكيو  يې خوراكي او درسي توكي ووېشل.

ښاغلي بيات وويل، چې:

له ښوونكيو سره همكاري د ټولنې د هر وگړي دنده ده.

نوموړي زياته كړه، چې:

هيله لري، چې ښوونكي ښه او مرفه ژوند ولري.

د سيدال ناصري د نجونو عالي ليسي مديرې ميرمن ريحانې نوري وويل، چې:

دوى د څښاك پاكو اوبو ته لاسرسى نلري او د ښوونكيو ژوند هم خواردى.

دې له پوهنې سره د ملي او نړيوالو ټولنو له مرستو ستاينه وكړه.

د سيدال ناصري د نجونو په عالي ليسه كې څلور زره زده كوونكيوته په درې ښوونيزو وختونو كې د ښوونكيو لخوا تدريس كيږي.

دا دوه يم ځل دى، چې بيات بنياد د دغې ليسې له ښوونكيو او زده كوونكيو سره مرسته او همكاري كوي.