په افغانستان کې د ملګرو ملتونو د ماشومانو وجهي صندوق (یونیسف) په مارچ میاشت کې د ۳۵ زره اووه سوه خوارځواکو ماشومانو له درملنې خبر ورکړی دی.

د افغانستان د یونیسف په دفتر کې د تغذیې مسوول میلاني ګالوین د یکشنبې پر ورځ (د وري ۲۸) د هېواد په ځینو برخو په ځانګړې توګه کابل کې د خوارځواکۍ د زیاتوالي په اړه اندېښنه څرګنده کړې او څرګندوي، چې یونیسف به د ۲۰۳۳ زېږدیز کال تر پایه یو اعشاریه یو میلیون ماشومان ورغوي.

نوموړې ټویټ کړی؛ یونیسف اټکل کوي، چې د روان کال تر پایه به له پېنځه کلونو څخه لږ عمر لرونکي ۳ اعشاریه ۲ میلیون ماشومان له خوارځواکۍ سره مخ شي.

په افغانستان کې د یونیسف دفتر یو ځل بیا خبرداری ورکړی، چې که بشپړې هڅې تر سره نشي؛ ښايي په افغانستان کې یو میلیون ماشومان له خوارځواکۍ خپل ژوند له لاسه ورکړي.