سیمه ییز خبرونه
د اداري اصلاحاتو او ملكي خدمتونو د خپلواك كميسيون چارې رڼې ندي
د مشرانو جرگې يو شمېر غړو د اداري اصلاحاتو او ملكي خدمتونو پر خپلواك كميسيون سختې نيوكې وكړې، چې د دوى په وينا چارې يې يو لړ نيمگړتياوې لري.
مشرانو جرگې د اداري اصلاحاتو او ملكي خدمتونو د خپلواك كميسيون رئيس د يكشنبې په ورځ ( د مرغومي ۲۴ ) خپلې عمومي غونډې ته غوښتى وو.
د مشرانو جرگې غړو بلقيس روشن او حمېرا نعمتي پر دې بنسټ له دې امله نيوكې وكړې، چې د دوى په وينا، چارې يې رڼې نه دي، د اداري فساد او د ملي شورا د ځينو غړو د لاسوهنو په پاېله كې له دې لارې دولتي پستونو ته ورتلونكي كسان وړ او په كار پوه نه دي.
د مشرانو جرگې دې غړو ويل، د پلازمينې او ولايتونو په دولتي ادارو كې سمون نه دى راغلى، د كميسيون چارې رڼې نه دي خلك ستونزو سره مخ دي او د بې كارۍ كچه ورځ تر بلې زياتېږي.
خو د اداري اصلاحاتو او ملكي خدمتونو د خپلواك كميسيون رئيس احمد مشاهد وايې:
د تېرو په پرتله د دوى چارې ښې شوې دي او د ملكي مامورينو لپاره د كار د برابرولو تر څنگ ډېرې آسانتياوې ورته برابرې شوې دي.
احمد مشاهد په خپلې اړوندې ادارې كې د فساد شتون رد كړ او ويې ويل، چې كه څه هم د دوى چارې له يو لړ نيمگړتياو سره مخ دي خو كارونه شفاف پر مخ ځي.
د اداري اصلاحاتو او ملكي خدمتونو خپلواك كميسيون وايې، دا مهال دوى درې زره بستونه لري، خو دولس زره كسانو ورته د لار موندنې لپاره فورمې تر لاسه كړى دي.