تازه خبرونه
د اسلامآباد وروستی برید د پاکستان د داعشروزنې پایله ده – ذبیح الله مجاهد
ذبیح الله مجاهد له “ایران راډیو” سره په یوه مرکه کې ویلي: “داعش د مار په څېر دښمن دی؛ که تاسې یې په خپل لسټوني کې وپالئ، نو تاسې به هم وچیچي.”
د اسلامي امارت ویاند ذبیح الله مجاهد وايي، چې په اسلامآباد کې د اهل تشیع پر جومات وروستی برید د پاکستان د “داعشروزنې” پالیسۍ پایله ده.
په دې برید کې، چې شاوخوا یوه اوونۍ مخکې ترسره شوی؛ ۳۱ کسان ووژل شول او ۱۷۰ نور ټپیان دي.
ذبیح الله مجاهد له “ایران راډیو” سره په یوه مرکه کې ویلي: “داعش د مار په څېر دښمن دی؛ که تاسې یې په خپل لسټوني کې وپالئ، نو تاسې به هم وچیچي.”
د هغه په وینا؛ د “پټو او استخباراتي” موخو لپاره د داعش ډلې د کارولو پالیسي به نه یوازې د پاکستان د خلکو پر زیان وي، بلکې د افغانستان د خلکو لپاره به هم منفي پایلې ولري.
دغه راز مجاهد یو ځل بیا له تحریک طالبان پاکستان (TTP) څخه د اسلامي امارت د ملاتړ ادعا رد کړه او څرګندوي؛ هیڅ غیر مسوول وسلوال کس ته اجازه نشته، چې په افغانستان کې فعالیت وکړي.
هغه څرګنده کړې، چې اسلامي امارت د “وزیرستاني کډوالو” د بېرته ستنولو لپاره چمتووالی ښودلی و؛ خو پاکستان رد کړ او اسلامي امارت د پاکستان په غوښتنه، دوی ډیورنډ کرښې ته له نږدې سیمو څخه نورو برخو ته ولېږدول.
ذبیحالله مجاهد دا هم روښانه کړې، چې د لارو تړلو د دواړو هېوادونو سوداګرو ته زیان رسولی؛ خو پاکستان د افغانستان پر پرتله ډېر زیان لیدلی دی.
هغه دا هم ویلي؛ دوی به تر هغه وخته اجازه ورنکړي، چې پاکستان د سیاسي وضعیت له کبله د لارې د نه بندولو “تضمین” نه وي کړی.