د امریکا ولسمشر ډونالډ ټرمپ ویلي، حکومت یې د امریکا پر وسله‌والو ځواکونو د تاریخ تر ټولو ستره پانګونه کړې وه؛ خو د جو بایډن ادارې په افغانستان کې د پوځي تجهیزاتو یوه لویه برخه پرېښې ده.

ټرمپ د چارشنبې پر ورځ یوې غونډې ته ویلي؛ امریکا« د نړۍ تر ټولو پیاوړی او ځواکمن پوځ» لري او زیاتوي، چې د دغه ځواک ډېره برخه د هغه د ولسمشرۍ د لومړي پېر پر مهال رامنځته شوې وه.

هغه یو ځل بیا له افغانستان څخه د امریکايي ځواکونو د وتلو د بهیر په اړه د بایډن پر ادارې نیوکه وکړه او ادعا کوي، چې د امریکا ډېر پوځي تجهیزات په افغانستان کې پرېښودل شوي دي.

ټرمپ وایي:« هغوی د دې تجهیزاتو ډېره برخه طالبانو(اسلامي امارت) او افغانستان ته پرېښوده.»

نوموړي زیاته کړې، الوتکې او نور تجهیزات باید له افغانستان څخه ایستل شوي وی.

ټرمپ ویلي:« دا ډېر د افسوس وړ وه. ما ولیدل، چې څه روان ول. ډېر ناوړه کار وشو.»

کارپوهانو ویلي، چې ټرمپ په خپل دوه‌يم پېر کې ان یو ځل هم؛ پر هغو وسلو او تجهیزاتو، چې له افغانستان څخه د وتلو پر مهال یې پوځي ځواکونو ویجاړ کړي، خبرې نه‌دي کړي.

د ډله‌ییز امنیت تړون ټولنې(سي‌اس‌ټي‌او) ویلي، د دې ټولنې د ګډې قومندانۍ یوه پلاوي د پاکستان په پلازمېنه اسلام‌آباد کې د شانګهای همکاریو ټولنې د غړو هېوادونو د سرحدي ادارو د مشرانو په دولسمه غونډه کې ګډون کړی دی.

د راپور له مخې، د ډله‌ییز امنیت تړون ټولنې د ګډې قومندانۍ مشر جنرال اندري سردیوکوف غونډې ته ویلي، چې د دې ټولنې د مسوولیت په حوزه کې د راټوکېدونکو کړکېچونو پر وخت پېژندنه او د هغو د مدیریت لپاره د مناسبو تدابیرو نیول د ټولنې یوه اړینه دنده ده.

نوموړي ټینګار کړی، چې د ګډ امنیت خوندیتوب د ټولو اړوند نړیوالو بنسټونو له نږدې همکاریو پرته شونی نه‌دی.

په دې غونډه کې د شانګهای همکاریو ټولنې د ترهګرۍ ضد سیمه‌ییز جوړښت، د خپلواکو ګډو ګټو هېوادونو د ترهګرۍ ضد مرکز او د دغو هېوادونو د سرحدي ځواکونو د قومندانانو د شورا د همغږۍ د خدمتونو مشرانو هم ګډون کړی و. ګډونوالو د ګډو همکاریو د پراختیا او د دغو بنسټونو د کاري برخو ترمنځ د همغږۍ د پیاوړتیا په اړه خبرې کړې دي.

د افغانستان اسلامي امارت رهبر شیخ هبة‌الله آخوندزاده ویلي، عالمان په شرعي چارو کې واک لرونکي دي او خلک یې اطاعت کوي؛ امیران د شریعت له مخې په سیاسي، جهادي او اصلاحي چارو کې د واک لرونکي ګڼل کېږي.

نوموړي ټینګار کړی، که دغه دواړه ډلې غوره وي او خپلې دندې سمې ترسره کړي، ټول خلک به اصلاح شي.

آخوندزاده دغه څرګندونې د کندهار ولایت د ولسوالیو او ښاري حوزو له عالمانو سره د اسلامي نظام د ټینګښت او پیاوړتیا لپاره په جوړه شوې غونډه کې کړې دي. په دې غونډه کې ګڼو عالمانو، مخورو او د اسلامي امارت یو شمېر لوړپوړو چارواکو ګډون کړی و.

د اسلامي امارت رهبر زیاته کړې، چې عالمانو په هر وخت کې د دین، اسلام او شریعت د ټینګښت لپاره هڅې کړې دي او په سختو شرایطو کې یې دین ژوندی ساتلی او تر خلکو رسولی دی.

هغه ویلي:« الله تعالی دین او اسلام عالمانو او امیرانو ته سپارلی او د هغه د ساتنې مکلفیت یې ور تر غاړې کړی دی. امیران په خپل ځواک د دین، اسلام او شریعت ساتنه کوي او عالمان د شرعي احکامو پر بیانولو هغه خلکو ته رسوي.»

آخوندزاده ویلي، چې عالمان د الله تعالی له لوري د الهي حقونو د ساتنې لپاره استازي او ځایناستي دي او پر هغوی دروند مسوولیت ایښودل شوی، چې د الله دین خلکو ته ورسوي، احکام یې ورته بیان کړي، ترې دفاع وکړي او خلکو ته دیني لارښوونې وکړي.

نوموړي زیاته کړې، عالمان د منکراتو مخه نیسي او زیانونه یې خلکو ته بیانوي.

هغه وایي، که عالمان خپلې دندې پر کلکه اراده ترسره کړي؛ په ټولنه کې به تر ډېره منکرات له منځه ولاړ شي او د جاهلیت دودونه به پای ته ورسېږي.

آخوندزاده ټینګار کړی؛ اوس د خدمت لپاره مناسب فرصت برابر شوی، چې د الله دین ته خدمت وشي او اسلامي شریعت پلي شي.

هغه همداراز ویلي:« دا د الله تعالی لوی نعمت دی او اوس مسلمانان داسې نظام لري، چې خلک شریعت ته رابولي. الله تعالی نن په افغانستان کې شرعي نظام ټینګ کړی دی. له شرعي امیر سره بیعت د مسلمانانو پر اتفاق او د جهاد له لارې ترلاسه شوی دی.»

د اسلامي امارت رهبر له عالمانو غوښتي؛ له یو بل سره مینه او باور پیاوړی کړئ، چې مخالفین د اختلاف او تفرقې د رامنځته کولو فرصت پیدا نه‌کړي. هغه ویلي، باید د اطاعت روحیه هم د عالمانو ترمنځ او هم د خلکو په منځ کې پیاوړې شي، چې یووالی ټینګ او د فتنې دروازې وتړل شي.