د افغانستان د پوهنې وزارت په ښوونيز نصاب كې به بريل خط شامل شي

د پوهنې وزارت په پام كي لري، چي د سويدن كميتي په همكارۍ د افغانستان په ټولو ولايتونو كي هغه يوميليون كسانو ته د زده كړې زمينه برابره كړي، چې  د معلوليت په شمول د بېلابېلو ستونزو له كبله له زده كړې پاتې دي.

چارواكي زياتوي، دا كسان د ړندو او كڼو په شمول په ۱۲ بېلابېلو كتگوريو وېشل شوي دي.

د دغه وزارت تدريسي مرستيال غلام جيلاني همايون د معلوليت لرونكيو وگړيو لپاره د عام شموله زده كړو په  كنفرانس كي  وويل، چې:

په پيل كې به اتلس سوه ښوونكيو ته روزنه وركړ شي.

ښاغلى جيلاني زياتوي:

له زده كړې څخه په پاتې كسانو كې تر ۳۰۰ پورې هغه كسان هم راځي، چې ليدل نه شي كولى او يا هم كاڼه دي.

هغه ټينگار وكړ، چې د دغه پروگرام لپاره تگلاره جوړه شوې ده.

د افغانستان لپاره د سويدن كميتي رييس محمد امين قانت وايي، چې دې كميتې تر اوسه  په ديارلس ولايتونو كي ۳ زره معلولينو ته د لومړنيو زده كړو زمينه برابره كړې،  چي له دي جملي څخه يې ۱۵۰۰ تنه په بريل خط او اشاري ژبه زده كړې كوي.

ښاغلى قانت زياتوي، د پوهنې له وزارت سره به د معلولو وگړيو د ظرفيتونو په لوړولو كي پوره هڅې وشي.

د سويدن كميته په ډاگه كوي، چې د هېواد په څلور ولايتونو( هرات،  ننگرهار، بلخ  او تخار) كي د بريل خط  څلور مركزونه فعاليت كوي.

د يادونې وړ ده، چې بريل خط له ټكو جوړ شوى  او هغه كسان پرې ليك  او لوست  كوي، چې سترگې يې  ديد نه لري او يا هم ړانده دي.