سیمه ییز خبرونه
افغان دولت په تېرو لسو كلونو كې د ښځو د حقونو په خوندي كولو كې پاته راغلى دى
د افغانو ښځو د اجتماع مسئولين وايي، چې فقر، نا امني او كمزورى اقتصاد د دې لامل ګرځېدلي، چې په افغانستان كې د ښځو په وړاندې د تاوتريخوالي پېښې د اندېښنې وړ زياتې شي.
دوى نيوكه كوي، چې افغان دولت په تېرو لسو كلونو كې په داسې حال كې چې نړيوالې مرستې ورسره وې، د ښځو د حقونو په خوندي كولو كې پاتې راغلى دى.
په كابل كې د ښځو د حقونو مدافعانو او د مدني ټولنو استازو په يوه غونډه كې افغان دولت ته د هغو ستونزو د رسولو هڅه وكړه، چې په وينا يې افغانې مېرمنې ورسره لاس او ګريوان دي.
د افغانو مېرمنو د اجتماع رئيسه فتانه ګيلاني وايي:
دوى د ښځو په برخه كې په تېرو لسو كلونو كې شوي پرمختګونه زيانمنونكي بولي او اندېښنه څرګندوي، چې له دوه زره څوارلسم كال وروسته به په افغانستان كې د ښځو ژوند نور هم ستونزمن شي.
نوموړې پر افغانو مېرمنو غږ كوي په راتلونكو ټاكنو كې د خپلو رايو له حق څخه پوره استفاده وكړي او د كوم خاص امتياز په بدل كې چاته راېه ورنكړي.
دا اندېښنې او څرګندونې په هغه غونډه كې په ډاګه شوې، چې د ښځو د نړيوالې ورځې په ياد په كابل كې جوړه شوې وه.