ساینس او ټیکنالوژي
د افغان نجونو روباتیک ډلې بنسټوالې د دوحې ټولنې جایزه وګټله
د افغانستان د نجونو روباتیک ډلې بنسټوالې رویا محبوب د دوحې ټولنې کلنۍ جایزه وګټله.
د افغانستان د نجونو روباټیک ډلې بنسټوالې رویا محبوب نن (شنبه د وري ۶/ د مارچ ۲۶) د قطر امیر شیخ تمیم بن حمد ال ثاني رویا محبوب ته د ۲۰۲۲ کال د دوحې د کلنۍ غونډې جایزه ورکړه.
رویا محبوب ټویټ کړی: زه ډېره خوشحاله او ویاړم، چې دا اړینه جایزه ترلاسه کوم. زه د جلالتمآب شیخ تمیم بن حمد ال ثاني څخه د هغه له ملاتړ او سخاوته په کلکه مننه کوم. غواړم له ټولو هغو خلکو څخه په کلکه مننه وکړم، چې دا مراسم یې جوړ کړي دي.
د افغانستان لپاره د امریکا د ښځو ځانګړې استازې رینا امیري او د افغانستان لپاره د امریکا ځانګړي استازي توماس ویسټ میرمن محبوب ته د دې لاسته راوړنې مبارکي وړاندې کړه.
په ۲۰۲۱ کال کې د افغان نجونو روباټیک ډله د آسیا د ۳۰ ساینس پوهانو، اختراع کوونکیو او پانګوالو په نوملړ کې راغله.
د افغان نجونو روبوټیک ډله تر دې دمه څو روباټونه جوړ کړي، چې په کې یو ساده وینټیلاټور ( د مصنوعي تنفس ماشین) عفوني ضد کوچنی روباټ، د زعفرانو پروسسوونکی او د غنمو د راټولولو ماشینونه جوړ کړي دي.
افغان روبوټ جوړونکې نجونې د اسلامي امارت له رامنځته کېدو وروسته له هېواده ایستل شوې دي.