د نوماندو پېژندنه
د انجینیر قطب الدین هلال لنډه پېژندنه
< ![endif]–>
انجنیر قطب الدین هلال د مولوي ظهیرالدین دیوبندي زوی، د مولوي قیام الدین لمسی او په ۱۳۳۱ل.هـ کال د خوست ولایت په ځاځي میدان ولسوالۍ کې زیږیدلى دى.
انجنیر هلال په ۱۳۴۹ ل.هـ کال د کابل حربي ښوونځي څخه فارغ شوی، لوړې زده کړې يې د ساختماني انجنیرۍ په څانگه کې ترسره کړي او په ۱۳۵۴ل. هـ کال د تخنیک اکاډمۍ د مهندسۍ له پوهنځي د لسانس په کچه فارغ شوی دى.
هلال له فارغيدو وروسته تر ۱۳۵٧ ل.هـ کال پورې د ملي دفاع وزارت د طرحې او ديزاين په څانگه کې د دپلوم انجنیر په توگه دنده ترسره کړي ده.
نوموړى په همدې کال کې د سیاسي فعالیتونو له کبله د وخت د کمونستي رژیم لخوا د څرخي پله زندان ته واستول شو، چې له خوشې کيدو وروسته پاکستان ته مهاجر شو.
هلال د هجرت پرمهال د انجنير گلبدين حکمتيار په مشرۍ د حزب اسلامي د سیاسي کمیتې د مشر او د دې گوند لخوا د پکتیا د ولایتي مسوول په توگه دنده ترسره کړې ده.
نوموړي په ۱۹۸۰ل کلونو کې د جهادي تنظیمونو د اتحاد د نظامي کمیسیون غړی او د حزب اسلامي د دفترونو مسوول و.
همدا راز د داکتر نجیب د رژیم له سقوط وروسته د قیادي شورای غړی هم پاتې شوى دى.
هلال په پښتو، دري، انگلیسي، اردو او عربې ژبو روانې خبرې کولی شي.
دى د لومړي ځل لپاره په ۱۳۷۲ل. هـ کال او د دوه يم ځل لپاره په ۱۳۷۵ل. هـ کال کې د صدارت د لومړي مرستیال په توگه دندې ترسره کړې دي.
قطب الدين هلال د انجينير گلبدين حکمتيار په مشرۍ د حزب اسلامي د گوند مشهور غړى؛ خو اوسمهال د خپلواک کانديد په توگه د ۱۳۹۳ل کال د ولسمشریزو ټاکنو کانديد دى.
عنايت الله عنايت يې لومړى مرستيال او محمدعلي نبي زاده يې دوه يم مرستيال ټاکلى دى.
هلال واده کړى او شپږ اولادونه لري.