د کډوالو په چارو کې د ملګرو ملتونو د عالي کمیشنرۍ مشر برهم صالح له نړیوالې ټولنې غوښتي، چې افغانستان ته د بېرته راستنېدونکو د ملاتړ لپاره عملي ګامونه پورته کړي.

د نوموړي د څرګندونو له مخې، د ۲۰۲۳ز.کال له وروستیو راپدېخوا نږدې اووه میلیون کسان له ګاونډ هېوادونو افغانستان ته راستانه شوي، چې یو شمېر یې په سختو شرایطو او د خپلې خوښې خلاف بېرته ستانه شوي دي.

برهم صالح د دې ادارې د اجرائیوي کمیټې په غونډه کې ویلي، چې په افغانستان کې بېرته راستنېدونکي له بېوزلۍ، د خدمتونو له محدودیتونو او ګڼو نورو ستونزو سره مخ دي.

نوموړي همدارنګه د افغان نجونو د زده‌کړو او د خپلو هیلو د پوره کولو پر حق ټینګار کړی او له نړیوالو مشرانو یې غوښتي، چې خپلې ژمنې پر عملي اقداماتو بدلې کړي.

هغه ویلي، افغان نجونې د خوبونو او خیالونو غوښتنه نه‌کوي، بلکې داسې فرصتونه غواړي، چې وکولی شي خپلې هیلې او ارمانونه پوره کړي.

دغه راز افغان کارپوهانو ويلي، بېرته راستنېدونکي د خپل ژوند د بیا پیل لپاره کاري فرصتونو او دوامدار اقتصادي ملاتړ ته اړتیا لري.

د دوی پر اند، یوازې لنډمهاله مرستې نه‌شي کولی د دغو کورنیو ستونزې حل کړي.

د اسلامي امارت چارواکو بېرته راستنېدونکو ته د کار او زده‌کړو د فرصتونو پر برابرولو، د بشري مرستو پر اړتیا او له افغانستان سره د اقتصادي همکاریو پر اهمیت ټینګار کړی دی.

د افغانستان اسلامي امارت بهرنیو چارو وزیر امیرخان متقي ويلي، نړیوالې ټولنې د نشه‌يي توکو پر وړاندې د مبارزې په برخه کې د افغانستان د لاسته‌راوړنو د ملاتړ لپاره له بزګرانو سره د بدیل معیشت په برخه کې اړینې مرستې نه‌دي کړي.

د بهرنیو چارو وزارت د خپرې شوې خبرپاڼې له مخې؛ دغه موضوع د افغانستان لپاره د اروپايي ټولنې له نوي ټاکل شوي ځانګړي استازي ټوماس فریلیسن سره د امیرخان متقي په لیدنه کې وړاندې شوې ده.

د خبرپاڼې له مخې؛ په دې لیدنه کې دواړو لوریو د افغانستان د امنیتي وضعیت، د نشه‌يي توکو پر وړاندې د مبارزې او یو شمېر بشري او سیاسي موضوعاتو په اړه خبرې کړې دي.

فریلیسن د امنیت د ټینګښت او د نشه‌يي توکو پر وړاندې د مبارزې په برخه کې د اسلامي امارت لاسته‌راوړنې ستایلې او څرګندوي، چې د افغانستان د امنیت ټینګښت او د نشه‌يي توکو پر وړاندې مبارزه د اروپايي ټولنې د رسمي دریځ یوه برخه ده.

نوموړي ډاډ ورکړی، چې اروپايي ټولنه به هڅه وکړي له افغانستان سره په بېلابېلو برخو کې خپلې همکارۍ پراخې کړي.

د روسیې یوه لوړپوړي چارواکي خبرداری ورکړی، چې په افغانستان کې د امریکا د پوځي اډو بیا جوړېدا به د سیمې ټولو هېوادونو ته ګواښ وي.

د روسیې د امنیت شورا مرستیال منشي الکساندر ونیدیکتوف ویلي، چې امریکا په افغانستان کې د خپلو پوځي تاسیساتو د بیا جوړولو پر نیت ټینګار کړی دی.

هغه خبرداری ورکړی، چې د داسې یوې پوځي اډې جوړول به د سیمې ټولو هېوادونو ته مستقیم ګواښ وي.

نوموړي زیاته کړې، چې له کابل سره د روسیې د امنیتي خبرو اترو یوه موخه افغانستان ته د سیمې له بهرنیو هېوادونو څخه د پوځي تاسیساتو د بېرته ستنېدا مخنیوی هم دی.

د روسیې د امنیت شورا مرستیال منشي له افغانستان سره همکاري څو اړخیزه او د روسیې د ملي ګټو په چوکاټ کې بللې ده.

د الکساندر ونیدیکتوف د څرګندونو له مخې؛ دغه همکاري د امنیت د ټینګښت او په اورآسیا کې د سوله‌ییز او باثباته چاپېریال د رامنځته کولو لپاره ارزښت لري.

هغه زیاته کړې، چې روسیه یوازنی هېواد نه‌دی، چې د افغانستان له اوسنیو مشرانو سره اړیکې لري، بلکې د سیمې نږدې ټول هېوادونه له کابل سره مستقیمې اړیکې لري.

ونیدیکتوف ویلي، چې د شانګهای همکاریو ټولنې هم د دې ټولنې د تماس پخوانۍ ډلې له لارې له افغانستان سره د همکارۍ د بیا پیل موضوع څېړي.

نوموړي ویلي، د مسکو او کابل اړیکې په بېلابېلو برخو کې د بهرنیو چارو وزارتونو، دولتي ادارو او سوداګریزو کړیو له لارې پراخېږي.

هغه وایي، چې دواړو لوریو له دې مخکې د سوداګرۍ او اقتصادي همکاریو لپاره ګډه کاري ډله هم جوړه کړې او د دواړو هېوادونو ترمنځ د اړیکو د حقوقي چوکاټ د پیاوړتیا هڅې روانې دي.

ونیدیکتوف ټینګار کړی، چې له کابل سره اقتصادي همکاري د ټرانسپورټ او انرژۍ په برخو کې د سیمه‌ییزو پروژو د پلي کولو لپاره هم ارزښت لري.

دا په داسې حال کې ده، چې اسلامي امارت په افغانستان کې د امریکا د پوځي اډو له شتون سره مخالفت څرګند کړی دی.