سیمه ییز خبرونه
د بگرام زندان ۷۲ زندانيان بايد د سياسي پرېكړو له مخې خوشې نه شي
د افغانستان بشري حقونو خپلواك كميسيون له بگرام زندان څخه د ۷۲ زندانيانو پر خوشې كيدو اندېښنه ښيي او وايي، چې دا كسان بايد د سياسي پرېكړو له مخې خوشې نه شي.
د افغانستان د بشري حقونو خپلواك كميسيون وياند رفيع الله بيدار وايي، چې د بشري حقونو سرغړوونكي بايد له زندان څخه خوشې نه شي.
كميسيون وړانديز كوي، چې د بگرام زندان د زندانيانو دوسيې دې عدلي كميسيون وڅېړي؛ گرم، پړ او سپين كسان دې سره بېل شي.
د ولسي جرگې غړي فرخنده زهرا نادري، غلام حسين ناصري او ظهير سعادت هم له بگرام څخه د زندانيانو پر خوشې كيدو اندېښمن دي او وايي، چې د دغو كسانو له خوشې كيدو سره به ناامني زياته شي او پر ټاكنو به هم خپل ناوړه اغېز څرگند كړي.
دا په داسې حال كې، چې افغان دولت د بگرام زندان د دوه اويا زندانيانو د خوشې كولو په اړه خپل دريځ روښانه كړ؛ په وړاندې يې كورني او بهرني غبرگونونه را وپاريدل. امريكا هم ټينگار كوي، چې دغه زندانيان بايد خوشې نه شي.