د ملګرو ملتونو سرمنشي انټونیو ګوترش د دې ټولنې د ۲۰۲۷ز.کال د وړاندیز شوې بودجې په چوکاټ کې د افغانستان لپاره د ملګرو ملتونو د مرستندویه پلاوي( یوناما) د ۶۰ بستونو د حذفولو وړاندیز کړی دی.

ګوټرش د چارشنبې پر ورځ د ملګرو ملتونو عمومي اسمبلۍ پېنځمې کمیټې ته د وړاندیز شوې بودجې د وړاندې کولو پر مهال ویلي، د بستونو کمول د دې ټولنې په ځانګړو سیاسي ماموریتونو کې د پراخو بدلونونو یوه برخه ده او موخه یې د کاري وړتیا لوړول او د ټاکل شویو ماموریتونو له اړتیاوو سره د سرچینو همغږي کول دي.

د ملګرو ملتونو سرمنشي همدارنګه وړاندیز کړی، چې په افغانستان کې دې د دې ټولنې خپلواک څېړنیز میکانیزم ته ۳.۲ میلیون ډالره اضافي بودجه ځانګړې شي.

دغه میکانیزم په افغانستان کې د ترسره شویو نړیوالو درندو جرمونو په اړه د څېړنو د ملاتړ لپاره جوړ شوی دی.

د ملګرو ملتونو د ۲۰۲۷ز.کال لپاره وړاندیز شوې پروګرامي بودجه ۳.۳ میلیارډ ډالرو ته رسېږي، چې د ۲۰۲۶ز.کال له تصویب شوې بودجې څخه شاوخوا ۱.۲ سلنه کموالی ښيي.

ګوټرش ویلي، دغه بودجه د اصلاحاتو، کاري وړتیا لوړولو، حساب‌ورکونې پیاوړتیا او د ټاکل شویو پروګرامونو د پلي کولو لپاره د سرچینو د اغېزمنې کارونې په برخه کې د ملګرو ملتونو د روانو هڅو څرګندونه کوي.

د اوسپنې‌پټلۍ ادارې عمومي ريیس عبدالکریم فاتح د یوه تخنیکي پلاوي پر مشرۍ د اقتصادي همکاریو ټولنې(ایکو) په سیمه‌ییزه غونډه کې د ګډون لپاره قزاقستان ته روان شو.

ټاکل شوې، چې عبدالکریم فاتح په دې غونډه کې د افغانستان د اوسپنې‌پټلۍ د اوسني وضعیت، روانو پروژو او راتلونکو پلانونو په اړه وینا وکړي او د سیمه‌ییز اتصال، سوداګرۍ، ټرانزیټ او اقتصادي همکاریو د پراختیا په تړاو د غړیو هېوادونو له استازو سره خبرې وکړي.

تمه ده، چې په دې غونډه کې د افغانستان ګډون به د ایکو د غړیو هېوادونو ترمنځ د اوسپنې‌پټلۍ په برخه کې د ګډو همکاریو، د پانګونې د فرصتونو او د سیمه‌ییز اتصال د پیاوړتیا لپاره زمینه برابره کړي.