سیمه ییز خبرونه
د دارالامان ماڼۍ بيا رغاونه له كورنيو عوايدو څخه داوطلبي ته وړاندې كيږي
په نږدې راتلونكې كې به د دارالامان ماڼۍ بيا رغاونه د كابل ښاروالي له كورنيو عوايدو څخه په گټه اخيستنه داوطلبي ته وړاندې شي.
دا ماڼۍ، چې ډېر كلونه د افغانستان د پلازمېنې مشهور او تاريخي ځايونه ول او د دې ښار ښكلا يي زياته كړې وه په اويايمه لسيزه كې د تنظيمي جگړو پر مهال له منځه ولاړل.
كابل ښاروال محمديونس نوانديش وايي، د دې تاريخي ماڼۍ د بيا رغاونې لپاره دېرش ميليون يورو ته اړتيا ده.
له دې سره په يوه وخت كابل ښاروال وايي، د تاج بيگ او چهلستون ماڼيو د رغاونې او بيا رغاونې لپاره هم هڅې روانې دي.
ښاغلى نوانديش زياتوي، چې خلكو ته د ماڼيو په بيا رغاونه كې د مرستو د وړانديز له كبله لږې پيسې ټولې شوي؛ خو دا يو نوى فرهنگ دى او خلك پخپله د ښار په بيا رغاونه كې ځانونه شريكوي.
دارالامان ماڼۍ د امان الله خان په واكمني كې د الماني مهندسانو له خوا جوړه شوه او دا ځل هم يو الماني شركت وړاندوينه كړې، چې د دې تاريخي ماڼۍ بيا رغاونه دېرش ميليون يورو ته اړتيا لري.