د داعش غړی اوغور بهادر اسلام‌آباد هوايي ډګر ته له ننوتلو وروسته په بلوچستان کې روزل شوی و- سرچینې

سرچینو ويلي؛ د ترکیې وګړی او د داعش غړی اوغور بهادر د اسلام‌آباد هوايي ډګر ته له ننوتلو وروسته د پاکستان د بلوچستان ایالت مستونګ سیمې ته تللی او هلته یې د داعش په یوه روزنیز کمپ کې روزنه ترلاسه کړې وه.

د سرچینو د څرګندونو له مخې؛ د کاظم زوی بهادر د ۲۰۲۵ز.کال په مارچ کې نیول شوی دی.

د سرچینو د ترلاسه شویو معلوماتو له مخې؛ بهادر د مستونګ په یوه روزنیز کمپ کې د روزنې په شپږمه دوره کې ګډون کړی و او هلته یې د« عبدالرحمان» مستعار نوم کاراوه. نوموړی له روزنې وروسته د نورو لارښوونو تر ترلاسه کولو پورې په «معاویه»نومي روزنیز مرکز کې پاتې شوی و.

سرچینو ويلي، د ۲۰۲۵ز.کال د فبرورۍ په وروستیو کې د داعش د مستونګ روزنیزو کمپونو له ویجاړېدا وروسته بهادر د دې ډلې د مشرانو پر لارښوونه له یو شمېر نورو غړیو سره د خیبرپښتونخوا ایالت اورکزو ولسوالۍ ته ولېږدول شو او وروسته یې د «عبدالله» تر  مستعار نامه لاندې کاراوه.

بهادر په اورکزو کې لومړی د حمزه نومي د داعش د یوه سیمه‌ییز قومندان په کور کې اوسېده. د فبرورۍ پر شلمه په تورسمت سیمه کې د حمزه له وژل کېدا وروسته؛ ویل کیږي، چې بهادر له هغې ډلې سره یوځای شو، چې مشري یې حاجي رحمان مشهور پر ابوناصر کوله.

د فبرورۍ پر اته‌ویشتمه په غلجو سیمه کې د یو لړ عملیات پر مهال د حاجي رحمان له وژل کېدا وروسته بهادر او د داعش یوه بل غړي یونس، چې د محمد زوی او پر یاسر مشهور و؛ هڅه وکړه پېښور ښار ته ولاړ شي.

د سرچینو پر وینا، پولیسو دغه دوه کسان د پلټنې په یو ځای کې د نشه‌یی توکو د قاچاق‌کوونکو پر تور ونیول شول؛ خو وروسته له داعش سره د هغوی د احتمالي تړاو په اړه خبر شول.

سرچینې ادعا کوي، چې د دغو کسانو نیول وروسته د یوې همغږې استخباراتي عملیاتو پایله وبلل شوه.