سیمه ییز خبرونه
د راتلونكي كال د حاجي صاحبانو لپاره پچه اچونه پيل شوه
د حج و اوقافو وزارت د هغو حاجي صاحبانو پچه اچونه پيل كړه، چې د جج د مراسمو د ترسره كولو لپاره يې نومليكنه كړې ده.
دغه وزارت د حج د مراسمو له زرگونه كسانو څخه هر كال دېرش زره د دې فريضې د تر سره كولو لپاره په پچه اچولو ټاكي.
د حج و اوقافو وزير محمديوسف نيازى وايي:
دغه وزارت د پچې اچونې لومړنى پړاو د كار د رڼښت لپاره پيل كړ، خو د حج د مراسمو د ادا كوونكيو نومليكنه به روانه وي.
د ښاغلي نيازي په وينا :
د لومړي پړاو په پچه اچونه كې څه نا څه ۲۵۰۰ گدونوالو برخه اخيستې ده.
د حج و اوقافو وزير وويل:
سږ كال به په سعودي عربستان كې د حاجي صاحبانو د تگ راتگ ستونزې حل شي. په تېرو كلونو كې سعودي عربستان ته د حاجيانو د ليږد او پچې اچونې بهير له ستونزو سره مخ و.
ښاغلى نيازى وايي:
تېر كال د حج په مراسمو كې د ملي شورا د غړيو ډله ييز گډون نه يوازې ستونزې رامنځته كړې، بلكې د نيوكو غږ هم پرې راپورته شو.
نوموړي ټينگار وكړ، چې:
د حج و اوقافو وزارت د ملي شورا د استازيو د گډون مخنيوى كولى نه شي.
ښاغلي نيازي زياته كړه، چې د ملي شورا استازي دې پخپله پرېكړه وكړي او د غوښتنو او اړتياوو له مخې دې يو د ډاډ وړ ميكانيزم رامنځته كړي.