د سولې عالي شورا نه شي کولی، چې وسله وال طالبان د خبرو میز ته کینوي

د ننگرهاروالي گل اغا شېرزي له اریانا تلویزون سره د یوې ځانگړې مرکې  پرمهال وویل، چې:

د سولې عالي شورا په اډانه کې د روغې جوړې اوسنۍ هڅې نمایشي دي او دوی به ونه توانیږي، چې وسله وال مخالیفین د خبرو میزته کينوي.

نوموړى د دې کارعلت په یاده شورا کې د لوړ پوړيو دولتي چارواکو گمارنه بولي او د یوې بلې بې  پرې جرگه گۍ د جوړولو وړاند یزکوي.

والي گل اغا شېرزی په افغانستان کې د اوسنیو ټولو ستونزو د حل لپاره له دغه هېواد څخه د بهرنیو ځواکونو پر وتلو ټینگارکوي او وايي، چې:

نړیواله ټولنه دې له افغانانو سره خپلې مالي مرستې جارې وساتي، خو واکمني دې افغانانو ته پریږدي.

شېرزی د راتلونکيو ولسمشریزو ټاکنو په ترسره کیدو هم ټنگار وكړاو له ولسمشرحامد كرزي او جهادي مشرانو څخه غوښتنه کوي، چې د رڼو ټاکنو لپاره دې زمینه برابره کړي.

نوموړی وايي:

که ولس وغواړي، دی به هم د ټاکنو میدان ته ورودانگي.

والي گل اغا شېرزي څرگنده كړه، چې:

د ټاکنو د نېټې له اعلان سره سم یوشمېرکړۍ او ځينې اشخاص زما او د ځینو نورو ملي شخصیتونو د شخصیت وژنې هڅې کوي.

د نوموړي په وینا:

موږ به هيڅكله د دغو توطیو ښکار نه شو او د ټولو گواښونو په وړاندې به د خپل هېواد د پرمختگ لپاره مبارزه كوو.

دا په داسې حال کې ده، چې څه موده وړاندې یوې امریکايي ورځپاڼې وال سټریټ ژورنال او د پارلمان یو شمېراستازيو ننگرهار والي شېرزی په پراخه اداري فساد کې ښکېل بللی و.