د سیاسي گوندونو په اړه د عدليې وزارت څرگندونې له غبرگون سره مخ شوې

په هېواد کې یو شمېر سیاسي گوندونو د عدليې وزارت د وروستیو څرگندونو په غبرگون کې په ډاگه كړې، چې:

د امنیتي شرایطو له كبله نشو کولی، چي خپل ولایتي دفترونه پرانیزو.

دوى د عدليې وزارت دغه نوې مقرره  د سیاسي گوندونو په وړاندې یوه سیاسي تو‌طعه بولي.

عدليې وزارت ویلي، هغه لسگونه سیاسي گوندونه، چې یو کال مخکې له دوی سره ثبت شوي؛ د قانوني معیارونو د نه پوره کولو له كبله به ترې جواز واخیستل شي.

د دې وزارت د گوندونو د ثبت او بررسۍ رییس ویلي، چې ان یو سیاسي گوند هم په شل ولایتونو کې نمایندگي نه لري. باید له دغو سیاسي گوند ونو څخه جواز بېرته واخیستل شي.

د انصاف گوند رییس احمد شاه ځدران او د ملی ائتلاف گوند غړی فضل الرحمن اوریا  دا څرگندونې د قناعت وړ نه بولي او وایي، چې:

د گوندنو د قانون له مخې  مونږ ټول شرایط پوره کړي،  خو د نوې مقررې پر بنسټ، چي باید  سیاسي گوندونه په شل ولایتونو کي رسمي دفتر پرانیزي؛ د امنیتي شرایطو له امله ستونزمنه ده، چې دفترونه په كې پرانستل شي.

د خلق گوند د مشرتابه غړى شېرگل اویستا وايي:

دغه مقرره  د سیاسي گوندونو په وړاندې یوه سیاسي تو‌طعه ده.

دا په داسې حال کې ده، چي له عدليې وزارت څخه ۵۵ سیاسي گوندونه د فعالیت جواز غواړي؛ خو د عدلیې وزارت چارواکي وايي، پېنځه څلویښت فعال سیاسي گوندونه، چې له دوى سره ثبت شوي تر دې دمه توانیدلي نه دي، چي قانوني معیارونه پوره کړي.

د عدليې وزارت د چار واکوپه وینا، د افغانستان د سیاسي گوندونو د قانون له مخې کله، چې یو سیاسي گوند له عدليې وزارت څخه د فعالیت جواز اخلي باید د یو ه کال په موده کې لږ تر لږه  د هېواد په ۲۰ ولایتونو کي  نمایندگي ولري.