د غزني د مركزي محبس په يوه خونه كې دېرش بنديان ساتل كيږي

د غزني د مركزي محبس په يوه خونه كې د دېرش بنديانو ساتل د بنديانو تر منځ بېلابېلې ناروغۍ را منځته كړي دي.

مسوولين وايي، د ځاى د نشتوالي له كبله اړ يو، چې دا كار وكړو.

پر دې مسالې رسنيو وخت ناوخته راپورونه هم خپاره كړي دي.كه څه هم د هرې ورځې په تېريدو د بنديانو په شمېر كې زياتوالى راځي؛ خو د دې ستونزې د حل لپاره تر اوسه هيڅ عملي اقدام نه دى شوى.

د دغه زندان له جوړيدو لسگونه كلونه تېر شوي، چې اوس زوړ او د گټې اخيستنې وړ نه دى؛ خوسره له دې هم څه ناڅه ۵۰۰ بنديان په كې ساتل كيږي.

د دې زندان كوټې د رڼا لپاره يوه درمڅه لري، چې له هغې هم لمر نه ورننوځي او دومره تيارې دى، چې سم په كې سم څه نه ښكاري.

د زندان د مركزي كلينيك داكتر حضرت گل نظري د دغه زندان له وضعې ډېر اندېښمن دى.

د زندان په يوه برخه كې بنديان لمر ته كښيني او د لاسي شيانو په جوړونه بوخت دي، خو خپلو دسيو ته له لاسرسي گيله من شوي دي.

د څارنوالۍ ، امنيه قوماندانۍ او صحت عامې چارواكو ترې هم ليدنه وكړه.

سره له دې د زندان مسوول عبدالرحمن ساپى د زندان وصعه ښه گڼي، خو د ځاى له تنگوالى اندېښمن دى.

د يادونې وړ ده، چې نه يوازې د غزني زندان بنديان له ستونزو سره مخ دي، بلكې د ټول هېواد زندانيان په خپلو زندانونو كې له ورته ستونزو سره مخ دي.