سیمه ییز خبرونه
د فارياب په غورماچ ولسوالۍ كې يوولس وسلوال طالبان ووژل شول
د فارياب په غورماچ ولسوالۍ كې د افغان امنيتي ځواكونو او وسلوالو طالبانو تر منځ په نښته كې يوولس وسلوال طالبان وژل شوي دي.
سيمه ييز چارواكي وايي، چې په دغه نښته كې د وسلوالو طالبانو درې سيمه ييز قوماندانان هم وژل شوي دي.
وسلوالو طالبانو له رسنيو سره په اړيكه كې يوازې د خپلو پېنځه تنو د ټپي كيدو پخلى كړى او ادعا كوي، چې شل تنو پوليسو ته يې مرگ و ژوبله اړولې ده.
د فارياب والي محمد الله بتاش وايي:
په دغه نښته كې يوولس ولسوال طالبان وژل شوي دي.
نوموړى زياتوي، د ولسوالۍ وضيعت اوس ښه دى. له تېرو اووه مياشتو را پديخوا د غورماچ ولسوالۍ امنيتي مسووليت افغان امنيتي ځواكونو ته سپارل شوى او له وسلوالو مخالفينو سره د دوى ورستۍ نښتې د افغان ځواكونو پياوړتيا ښيي.
د غورماچ او قيصار ولسوالۍ يو شمېر قومي مشران د افغان هوايي ځواك نه شتون يوه تشه بولي؛ خو د فارياب والي بيا وايي، د دې لپاره يې په تېرو نښتو كې له هوايي ځواك څخه كار نه دى اخيستى، چې ملكي وگړيو ته مرگ و ژوبله وانه وړي.
د فارياب غورماچ ولسوالي په تېرو درې ورځو كې د افغان امنيتي ځواكونو او وسلوالو طالبانو د خونړيو نښتو شاهده وه.