سیمه ییز خبرونه
د كابل د چهلستون سړك د جوړولو چارې بشپړې شوې
كابل ښار والۍ د يكشنبې په ورځ(د وږي ۳۱) د كابل د چهلستون سړك د جوړولو چارې، چي دوه كاله مخكي يې پيل كړې وې بشپړې كړې.
په دې سړك درې نيم ميليون افغانۍ لگول شوې دي.
د كابل ښاروال محمد يونس نو انديش وايي، د چهلستون سړك له بابربڼ څخه تر چهلستون ماڼې پورې نږدي ۵ كيلو متره اوږدوالي لري او د كابل ښاروالۍ له بوديجې د دوه كلونو په موده كې جوړ او گټي اخستني ته چمتو شو.
د نوموړي په وينا، د سړك له جوړيدو سره به د سيمي د گڼ شمېر خلكو ستونزي حل شي.
كابل ښاروال وايي، چې په نږدې راتلونكي كې به د كابل سيند د پاكولو او د ده مراد خان سړك د جوړولو چارې هم پيل شي.
دغه راز په همدې ورځ د كابل ښاروال لخوا د چهلستون قصر ته څيرمه د ښځو لپاره د فاتحې د يوه څلور پوړيزه سالون د بنسټ ډبره هم كيښودل شوه.
د ښاروال په وينا، د دغه سالون د جوړولو چارې به په ۲۶ ميليون افغانيو په يوه كال كې بشپړې شي.