سیمه ییز خبرونه
د كابل په شېرپور كې د موتر بم د چاودنې مخه ونيول شوه
د كابل په شېرپور سيمه كې امنيتي ځواكونو نن سهار(يكشنبه د تالې ۶) يو ځانمرگى بريد كوونكى وواژه.
نن سهار ۹:۱۵ بجې يو بريد كوونكي غوښتل، چې له چاوديدونكيو توكو ډك موتر د سولې عالي شورا دفتر ته دننه كړي؛ خو امنيتي چارواكو دغه بريد شنډ كړ.
د كابل امنيه قوماندانۍ چارواكي وايي:
بريد كوونكى له بريد وړاندې امنيتي ځواكونو پېژندلى او ووژل شوى دى.
د دوى په وينا، له چاوديدونكيو توكو ډك موټر له يوې گړۍ وروسته خنثى شوى دى.
د يو بل خبر له مخې د ننگرهار ولايت د ملي امنيت رياست تر څيرمه نن سهار اووه نيمې بجې موتربم چادونه شوې، چې په كې د دغه رياست دوه تنه وژل شوي او يو ټپي دى.
د ننگرهار ولايت د امنيه قوماندانۍ وياند حضرت حسين مشرقيوال وايي:
په دې پېښه يو كس وژل شوى او درې نور ټپيان دي.
د ننگرهار والي وياند عبدالزي په ډاگه كړې، چې په دې پېښه كې دوه كسه د ملي امنيت د يو كاركوونكي په گډون وژل شوي او درې نور ټپيان دي.
همدارنگه د لوگر ولايت په مركز پل عالم كې يوې چاودنې يو پوليس وژلى او دوه نور ټپيان دي.
د لوگر امنيتي چارواكي وايي، چې چاودنه نن سهار ۸ بجې د پوليسو پوستې ته نږدې رامنځته شوې ده.
طالبانو د ننگرهار او لوگر د چاودنو مسووليت په غاړه اخيستى دى.