سیمه ییز خبرونه
د كابل پوهنتون په پښتو او دري څانگو كې به د دكتورا تر كچې د زده كړو بهير پيل شي
د كابل پوهنتون د ژبو او ادبياتو پوهنځي په پښتو او دري څانگو كې به په راتلونكي كال كې د دكتورا تر كچې د زده كړو بهير پيل شي.
د لوړو زده كړو وزارت وايي:
په پام كې ده، چې د دكتورا په كچه زده كړې به په راتلونكي كې د كابل او ولايتونو پوهنتونونو ته هم پراخې شي.
چارواكي وايي:
د دكتورا په كچه د زده كړو بهير به نور محصلان اړ نه كړي، چې بهر ته د زده كړو د دوام لپاره ولاړ شي.
د لوړو زده كړو وزير عبيدالله عبيد وايي:
د كابل پوهنتون د ژبو او ادبياتو د پوهنځي په پښتو او دري څانگو كې به د دكتورا په كچه د زدكړو پيل د مسلكي ښوونكيو د وړتياوو په لوړلو كې ډېره مرسته وكړي.
نوموړى زياتوي:
د زده كړو دا درې كلن پړاو به د ژبو او ادبياتو د پوهنځي دېرش تنه كدري غړي پر مخ وړي.
د لوړو زده كړو وزير زياته كړه:
د دكتورا او ماسترۍ په كچه به د زده كړو بهير د كابل او نورو ولايتونو اړوندو پوهنتونو ته هم په راتلونكې كې وغزول شي او د نورو هېوادونو محصلان به هم وكړاى شي، چې خپلې زده كړې د افغانستان په پوهنتونونو كې بشپړې كړي.
د كابل پوهنتون د ژبو او ادبياتو پوهنځي پښتو او دري څانگي په ۱۳۳۵ لمريز كال كې را منځته شوي، چې دا مهال په كې نږدې دېرش استادان، چې د ماسترۍ او دكتورا په كچه يې زده كړې كړي، په دندو بوخت دي. د دې پوهنځي په بېلابېلو ديپارتمنتونو كې دا مهال څه د پاسه زر زده كوونكي زده كړې كوي.