سیمه ییز خبرونه
د لیلیي د نه شتون له امله ډېرې انجونې سږ كال له لوړو زده كړو بې برخې پاته دي
د فارياب په پوهنتون كې د انجونو د ليليې د نه شتون له امله ډيرې انجونې سږ كال له لوړو زده كړو بې برخې پاته دي.
فارياب سږ كال د لومړي ځل لپاره د پوهنتون خاوند شو، خو په دغه پوهنتون كې د انجونو د ليليې نه شتون يو شمېر محصلې انجونې له ستونزو سره مخ كړې دي.
د فارياب د پوهنتون چارواكي وايي، چې د ليليې د نه شتون له امله ډېرى انجونې ونه توانېدې تر څو خپلې لوړې زده كړې پر مخ يوسي او يو شمېر نورې د له سختو ستونزو سره په كرايې كورونو كې ژوند كوي.
په همدې حال كې يو شمېر محصلې انجونې له حكومت څخه غواړي تر څو دغه ستونزه ژر تر ژره هواره كړي.
د فارياب د والي مرستيال عبدالستار بارز بيا وايي، چې په نږدې راتلونكې كې به د دغې ستونزې د هوارولو په موخه يوه نوې ودانۍ پرانيستل شي.
د چارواكو په وینا اوس مهال د فارياب په پوهنتون كې شاوخوا پنځه زره محصلين په زده كړو بوخت دې، چې نږدې دوه زره تنه يې له نورو ولايتونو څخه فارياب ته راغلي دي.