سیمه ییز خبرونه
د مارشال فهيم د جنازې مراسمو ته د نړۍ د نږدې پنځوسو هېوادونو استازي راغلي وو
د مارشال محمد قسيم فهيم د جنازې تشريفاتي مراسم په ارګ او دفاع وزارت كې تر سره شول. په دې مراسمو كې د جګپوړو دولتي چارواكو سر بېره د پنځوسو هېوادونو استازو هم ګډون كړى وو.
د مارشال محمد قسيم فهيم مړى د ځانګړو پوځي مراسمو په ترڅ كې د سردار محمد داوود خان له روغتون څخه تر دفاع وزارته بدرګه شو.
د ارګ په جومات كې د مارشال فهيم د جنازې لمونځ د ولسمشر او نورو دولتي چارواكو په ګډون د عبدالرب رسول سياف په امامت تر سره شو.
د جنازې له لمانځه وروسته افغان ولسمشر حامد کرزي وويل:
تېر دولس كلونه يې له مارشال سره د خوښۍ او غم شېبې شريكې تېرې كړې دي.
د مارشال فهيم د جنازې مراسمو ته د نړۍ د نږدې پنځوسو هېوادونو استازي راغلي وو.
د افغان ولسمشر حامد كرزي په وېنا مارشال محمد قسيم فهيم له ده سره د هېواد په كورني او بهرني سياست او برخليك ټاكونكو مسايلو كې ملګرتيا كوله.
د مارشال محمد قسيم فهيم زوى اديب فهيم هم د خپل پلار د هيلو او ارمانونو په باب خبرې وكړې.
ده وويل، چې پلار یی د ژوند زياته برخه له اشغالګرو سره په مبارزه كې تېره كړي ده.
فهيم شپږ پنځوس كلن و، چې د يكشنبې په ورځ ( د کب ۱۸ ) يې د شكرې او زړه د ناروغۍ له كبله مړ شو.