1393ټاكنې
د ملي وحدت کمیسیون په درې کمیتو کې د نوي حکومت پر جوړولو کار کوی
د ملي وحدت کمیسیون له جوړیدو څلور ورځې تېرې شوي، چې په کې د ملي وحدت حکومت پر سیاسي جوړښت کار کوي.
د اصلاحاتو او همپالنې تیم په دې اند دی، چې:
د ملي وحدت کمیسیون د راتلونکي حکومت پر جوړښت، د ټاکنو پر وروستې نېټه او د نوي ولسمشر د لوړې د مراسمو پر نېټه خبرې کړي او هوکړې ته هم رسیدلي دي.
د اصلاحاتو او همپالنې تیم غړی فضل الرحمان اوریاوایي، په دې کمیسیون کې زړه راکښونکې سیاسي خبرې روانې دي او دا هیله هم رامنځته شوې، چې د کمیسیون د کار په پای کې به غوره پایله تر لاسه شي.
د کمیسیون او د اصلاحاتو او همپالنې د تیم غړي محمد ناطقي پخپله فیسبوک پاڼه کې لیکلي، چې:
له دغو درې کمیتو څخه د ملي وحدت، موخو او ماموریت کمیته گډ تعریف ته نږدې شوې او په ملي برنامه کې هیڅ ستونزه نشته؛ خو ډېره جنجالي کمیټه په کې د ملي وحدت حکومت د جوړښت کمیته ده. که څه هم په اصولو کې منل شوي، چې اساسي قانون، د چنگاښ د ۲۱ او د زمري د ۱۷ گډې هوکړې ، چې د اجرائیوي څوکۍ او اپوزیسیون رول په کې روښانه شوی، منل شوي دي.
د تحول او تداوم تیم غړی داود سلطانزوی وایي:
دمگړۍ د ملي وحدت کمیسیون د ملي وحدت حکومت پر تعریف کار کوي، چې ځانگړی تعریف ورته ومومي.
نوموړی ټینگار کوي، چې د ملي وحدت حکومت له تعریف پرته نور ټول کارونه بې پایلې دي.
د ټاکل شوي مهال وېش له مخې دا کمیته باید تر ۸ ورځو پورې خپل کار بشپړ کړي او د بحث پایله د تیمونو مشرانو ته وسپاري.
ولیدل شي، چې دا کمیته به ټاکل شوې دنده تر سره کړي او که نه.