تازه خبرونه
د ننګرهار په مرکز کې ماین چاودنې دوه پولیس وژلي
د ننګرهار ولایت په جلال آباد ښار کې نن سهار د سړک غاړې ماین چاودنې دوه سیمه ییز پولیس وژلي دي.
د ننګرهار والي د رسنیو دفتر د پېښې پخلی کړی او څرګندوي؛ چاودنه د جلال آباد ښار د څلورمې ناحیې د ګرین مارکیټ په اړوند سیمه کې رامنځته شوې شوې، چې له کبله یې دوه سیمه ییز پولیس وژل شوي دي.
د یاد دفتر د خبر پاڼې له مخې؛ په پېښه کې درې نور سرتېري ټپیان شوي دي.
په خبرپاڼه کې راغلي، چې د برید موخه د دغه ولايت د چپرهار ولسوالۍ د سيمه یيزو پوليسو موټر و.
دغه راز نن سهار په کابل کې یوې چاودنې یو امنیتی ساتونکی ټپي کړی دی.
د کابل پولیسو ويلي، چاودنه د کابل د اتمې حوزې اړوند په نوې کارته کې رامنځته شوې، چې موخه یې یو امنیتي موټر و.
تر دې دمه د دې پېیښو مسوولیت چا پر غاړه ندی اخیستی.