سیمه ییز خبرونه
د هرات ولايت كاشي كاران له ملاتړ برخمن شول
په هرات كې د كاشي جوړولو فابريكه، چې تېر كال له مخ پرځوړ حالت سره مخ وه، سږ كال يې د هرات د جامع جومات د خدمتگارانو ټولنې په ملاتړ ستونزې ليرې شوې دي.
د هرات د تاريخي آبدو د آمر ايام الدين اجمل په وينا، د جامع جومات د خدمتگارانو ټولنې ملاتړ د دې سبب شو، چې د كاشي جوړولو فابريكې تشكيلات پراخ او د اړتيا وړ لومړني مواد تر لاسه كړي.
ښاغلى اجمل د كاشي جوړولو د فابريكې پر اوسني فعاليت خوښ دى او وايي:
كه كارونه همداسې روان وي، په راتلونكې كې ترې د ډېرو پرمختگونو تمه كيږي.
دا مهال په دې فابريكه كې هغه كاشي جوړيږي، چې د هرات د جامع جومات دننه لگول كيږي.
د هرات د تاريخي آبدو د آمر په وينا، دې هنر ته پاملرنه او پراختيا به د دې لامل شي، چې په راتلونكيو كلونو كې دغه كاشي په نورو تاريخي بنسټونو كې هم وكارول شي.
د يادونې وړ ده، چې كاشي جوړول له اصيلو هنرونو څخه يو هنر دي او دا هنر په هرات كې اوږده مخينه لري.