سیمه ییز خبرونه
د هېواد په ختيځ كې د لويدلې چورلكې دوه سرتېري وژل شوي
په كابل كې د آيساف ځواكونو مطبوعاتي دفتر په ډاگه كړې، چې:
د افغانستان په ختيځ كې د سه شنبې په ورځ( د وري۲۰) د لويدلې چورلكې دوه بهرني سرتېري وژل شوي دي.
آيساف د پېښې د دقيق ځاى او د قربانيانو د هويت په اړه څه نه دي ويلي.
د ننگرهار والي وياند احمد ضيا عبدالزى وايي:
چورلكه د پچيراگام ولسوالۍ د كريخېلو په سيمه كې را لويدلې ده.
ښاغلى احمد ضيا عبدالزى زياتوي:
سيمې ته گن امنيتي ځواكونه رسيدلي او د پېښې سيمه د څارنې لاندې ده، خو د پېښې د احتمالي سرزيان په باب بشپړ معلومات نه دي تر لاسه شوي.
د پچيراگام ولسوال ميرباز ممتاز وايي:
په دې ولسوالۍ كې د امريكايي ځواكونو دوه چورلكو گزمه كوله، چې يوه يې د تخنيكي ستونزو له كبله را لويده او په كې سپاره ټول كسان وژل شوي دي.
نوموړي د وژل شويو شمېر ونه ښود.
طالب وياند ذبيح الله مجاهد ويلي، چې چورلكه طالبانو رانسكوره كړې او په كې سپاره ټول كسان وژل شوي دي.