سیمه ییز خبرونه
د هېواد په ديارلس تودو ولايتونو كې نوى تعلمي كال پيل شو
د شنبې په ورځ(د وږي۱۶) د ښوونځي د زنگ په كړنگيدو د هېواد په ديارلس تودو ولايتونو كې نوى تعلمي كال پيل شو.
په همدې موخه په يو شمېر ولايتونو كې غونډې هم جوړې شوې وي.
په فراه ولايت كې د دغه ولايت والي محمد عمر شېرزاد وويل، چې اوس هم د فراه ولايت په يو شمېر ناامنو سيمو كې د ناامنيو له كبله د زده كوونكيو په وړاندې ښوونځي تړل شوي دي.
د دغه ولايت يو شمېر زده كونكي د مسلكي ښوونكيو د نه شتون له كبله هم سرټكوي.
د فراه د پوهنې رييس محمد صابر فاروقي بيا وايي، چې د ياد ولايت د پوهنې بهير ته پوهنې وزارت لازمه پاملرنه نه ده كړې.
بل خوا د هلمند د كجكي ولسوالۍ اوسيدونكي كه له يوې خوا د ښوونځيو پيل كيدو ته خوښ دي؛ خو له بلې خوا د ناامنيو له كبله اندېښنه لري.
د پوهنې وزارت له مهال وېش سره سم هر کال د هېواد په ۱۳ تودو ولایتونو کې د سنبلې په پېنځلسمه نوی تعلیمي کال پیلیږي، چې د نورو ولايتونو تر څنگ کندهار، هلمند، فراه، زابل، خوست، پکتیکا او ننگرهار ولايتونه يې ناامنه ولاياتونه بلل كيږي.
د پوهني وزارت د معلوماتو له مخې اوس هم د هېواد په جنوبي، جنوب ختیځو او جنوب لویدیځو ولايتونو په يو شمېر سيمو كې شاوخوا څلور سوه ښوونځي د ناامنيو او د وسلوالو د گواښونو له كبله تړلي پاته شوي دي.