سیمه ییز خبرونه
د هېواد په شمال كې د جگړو پر لامل يو شمېر خلك كور پريښودو ته اړ شوي
د هېواد په شمال كې د دولت د وسله والو مخالفينو او افغان امنيتي ځواكونو ترمنځ د وروستيو نښتو له امله كابو ۱۳ سوه كورنۍ د خپلو كورونو پريښودو ته اړ شوي دي.
په شمال كې د كډوالو په چارو كې د ملگرو ملتونو د دفتر وياند فهيم همدرد وايي:
د هغو كسانو په منځ كې، چې د خپلو سيمو پريښودو ته اړ شوي، ۲۴۴ كورنۍ يې د بدخشان ولايت له وردوج او جرم ولسواليو تړاو لري.
په ژمي كې د بدخشان ولايت سړه هوا او د واورې سخت اورښت به د دې بې ځايه شويو كورنيو په وړاندې يوه ستره ننگونه وي.
ښاغلى همدرد زياتوي، په پام كې ده، چې په نږدې راتلونكي كې له دغو كورنيو سره خپلې ژمنۍ مرستې پيل كړي.
د بدخشان ولايت د وردوج او جرم او د فارياب ولايت د قيصار او المار ولسوالۍ په دې وروستيو كې د سختو ناامنيو شاهدې دي او ډېر شمېر اوسيدونكي يې د مرگ و ژوبلې له وېرې له خپلو سيمو تېښتې ته اړ شوي دي.