د ولسمشر غني پر فرمان له فساد سره د مبارزې کمیسیون رامنځته شو

د ولسمشراشرف غني په فرمان د اداري فساد پر وړاندې د مبارزې کمیسیون جوړ او پېنځه کسان د دغه کمیسیون د غړیو په توګه منظور شول.

د ولسمشرۍ ویاند صدیق صدیقي ویلي؛ د ولسمشر پر فرمان همایون حامد، مریم زرمتۍ، عبدالقیوم نظامي، سید محمد هاشمي او فرخ لقا د اداري فساد پر وړاندې د مبارزې د کمیسیون غړي ټاکل شوي دي.

په افغانستان کې د اروپايي اتحادیې ځانګړي استازي رونالد کوبیا د اداري فساد پروړاندې د مبارزې کمیسیون له جوړېدو هرکلی کړی او په خپل یوه تویت کې یې څرګنده کړې، چې دا کمیسیون د افغانستان د سولې او ښې حکومتولۍ لپاره ګټور دی.

دا په داسې حال کې ده، چې نن د اروپایي اتحادیې پلاوي په افغانستان کې د فساد پروړاندې د مبارزې پر پایلو د بیا کتلو لپاره د فساد پروړاندې شپږم کلنی کنفرانس جوړ او ترسره کړ.

اروپایي ټولنې په ډاګه کړې، چې په دې ناسته کې د مدني ټولنې، خصوصي سکتور، رسمي بنسټونو، رسنیو او نړیوالو سازمانونو ۱۵۰ کسانو برخه اخیستې وه.

په کابل کې د اروپايي اتحادیې سفیر اندریاس فون برانت ویلي؛ باور د سولې په روانو خبرو کې ترټولو مهم اصل دی. لږ تر لږه د دواړو خواو تر منځ باید باور وي او پر دې سربېره ټول ګډونه افغانستان، دیموکراتیک او جمهوري نظام هم غورو والی لري.

فون برایت د اداري فساد پروړاندې د مبارزې کمیسیون له جوړیدو هرکلی کړی او څرګندوي: “که څه هم پرمختګونه په دې برخه کې شوي؛ خو د فساد ضد هڅو ته اړتیا ده، چې د فساد پروړاندې سیاست پلی شي.

ولسمشر د دې کمیسیون د جوړولو په اړه ویلي: زه ډېر خوښ یم،  چې کمیسیون جوړ شو، د کمیسیون له پېنځه غړیو درې نرینه او دوه ښځې دي. دا کمیسیون به له ټولو واکونو او سرچینو برخمن وي، د کمیسیون غړي خلکو، ولسي جرګې او حکومت ته ځواب ویونکي دي.

 دا په داسې داسې حال کې، چې د ژنیوا ناستې ته یوولس ورځې پاتې دي.