سیمه ییز خبرونه
د ولسي جرگې يو شمېر غړيو د ولسمشر وروستۍ څرگندونې د ملي گټو پر ضد بولي
د ولسي جرگې يو شمېر غړيو د امريكا په اړه د ولسمشر وروستۍ څرگندونې د افغانستان د ملي گټو خلاف گڼلي دي.
ولسمشر حامد كرزي په تېرو څو ورځو كې د امريكا كړنې د نيوكو لاندې ونيولې او ويلي يې دي، چې په افغانستان كې امريكا او طالبان گډې موخې پالي.
دغه راز نوموړي په هلمند كې په ډاگه كړه، چې امريكا د افغانستان د ځمكنيو سرچينو لپاره دې هېواد ته راغلې ده.
اوس د ولسي جرگې يو شمېر غړي وايي، چې د ولسمشر په پاكستان كې د افغانستان د سفير عمر داودزي په مشوره دغه څرگندونې كړي دي.
په ولسي جرگه كې د كندهار استازى لالى حميدزى وايي:
ولسمشر حامد كرزي ته د امريكا او طالبانو تر منځ د پټو خبروډاډ عمر داود زي ور كړى دى.
د ولسي جرگې د يو شمېرغړيو په باور، د كابل او واشنگتن د اړيكو كړكېچ به د افغانستان لپاره په زړه پورې پايلې ونه لري.
د ولسمشر وياند ايمل فيضي د ولسي جرگې د دغو غړيو څرگندونې بې بنسټه وگڼلې.
د ولسي جرگې غړيو دغه راز د سولې په اړه د خبرو بهير پوښتنه پاروونكى بولي او د دې بهير په بيا كتنې يې ټينگار وكړ.
د ولسي جرگې د غړيو په وينا، په داسې حال كې، چې د افغانستان خلك هره ورځ د ترورستي بريدونو ښكاركيږي د سولې په اوسنى بهير ټينگار به هيڅ گټه ونه لري.
د يادونې وړ ده، چې ولسي جرگې يوځل بيا د هغو ۱۱ وزيرانو د استيصاح غوښتنه وكړه، چې د تېر كال انكشافي بوديجه يې له ۵۰ سلنې لږ لگولې ده.