سیمه ییز خبرونه
د ټاكنو د خپلواك كميسيون غړي د ځواب ويلو لپاره مشرانو جرګې ته غوښتل كېږي
د ټاكنو د خپلواك او د ټاكنيزو شكايتونو د كميسيونونو غړي د ځواب ويلو لپاره مشرانو جرګې ته غوښتل كېږي. د دې جرګې غړي وايي، چې د يادو كميسيونونو غړي لويې او وړې ستونزې لري، چې بايد په ملي شورا كې د خلكو استازو ته ځواب ووايې، له همدې سره د مدني ټولنو بنسټونه د ازادو او شفافو ټاكنو غوښتونكي دي.
هره ورځ، چې د ټاكنو وخت ته نږدې كېږي ورسره اندېښنې او ننګونې هم زياتېږي، د ښار په يوه برخه كې له لست څخه د لرې شويو نوماندانو ناندرۍ دي او د ښار په بله برخې كې په ټاكنو كې د ناامنيو او د درغليو د شتون وېره او اندېښنه.
د مشرانو جرګې غړي هم له يادو اندېښنو څخه نه دي پاته او وايي، چې د ټاكنو د خپلواك او د ټاكنيزو شكايتونو د كميسيونونو غړي له يو شمېر تېروتنو سره مخ دي او بايد د خلكو استازو ته ځواب ووايې.
د هېواد د څورلسو ولايتونو د مدني ټولنو غړي هم د راتلونكو ټاكنو د ترسره كېدو د څرنګوالي په باب اندېښنه لري، دوى نا امني، د ټاكنيزو كميسيونونو خپلواكي او د حساب وركونې د يوې كړنلارې نه شتون د راتلونكو ټاكنو په وړاندې جدي ستونزې ګڼي.
دوى د دولت له وسله والو مخالفينو څخه غواړي، چې په ټاكنو كې د خلكو د رايې وركونې مخه ونه نيسې او د رايې وركوونكو د ګوتو له پرې كولو ډډه وكړي.
د مشرانو جرګه او مدني بنسټونه په داسې حال كې دا څرګندونې كوي، چې د ټاكنو خپلواك كميسيون په كراتو ويلي، چې راتلونكې ولسمشريزې او د ولايتي شوراګانو ټاكنې به د تېرو ټاكنو په پرتله په كراتو شفافې ووسې، دا چې راتلونكې ټاكنې به څومره شفافې تر سره شي هغه پوښتنه ده، چې وخت به ورته ځواب ووايې.