د پاکستان د غنمو لومړنۍمرسته افغانستان ته راورسېده

پاکستانيو چارواکو څرګنده کړې؛ د تورخم پر پوله یې د بشري مرستو د ۱۸ زره ټنو غنمو یوه ټولګه افغان چارواکو ته سپارلې ده.

د دوی په خبره؛ دغه ټولګه د هغو پنځوس زره ټنو غنمو یوه برخه ده، چې ټاکل شوې د پاکستان د لومړي وزیر عمران خان د ځانګړي فرمان له مخې افغانستان ته راولېږدول شي.

د پاکستان د لومړي وزیر سلاکار شهزاد ارباب ویلي؛ د لومړي وزیر(عمران خان) بشري مرستې پېنځه میلیارډ پاکستانۍ کلدارې ارزښت لري. دا د غنمو لومړۍ جوپه ده، چې نن مو وزیر ته وسپارله.

د نوموړي د څرګندونو له مخې؛ افغانستان ته د پاکستانيو غنمو د لېږد بهیر به روان وساتل شي.

شهزاد ارباب زیاته کړې: دا بهیر روان دی. مونږ به د دوی (افغان چارواکو) د مشورې له مخې په اوونۍ کې دوه ټولګې غنم او د ژوند ژغورنې درمل هر ځای ته، چې وغوښتل شي رسوو.

د اسلامي امارت د بهرنیو چارو استازي مولوي عباس اخوند د پاکستان له حکومت څخه په دې اړین وخت کې د افغانستان له خلکو سره د دوی له مرستو مننه کړې او ترڅنګ يي پر نړیواله ټولنه او ملګرو ملتونو نیوکې وکړې، چې د افغانستان شتمني يې کنګل کړي او په ملګرو ملتونو کې يې پخپلسر د افغانستان څوکۍ بل چاته ورکړې ده.

نوموړي له نړیوالو غوښتي؛ که له افغان ولس سره بشردوستانه مرستې ونشي، نو یو ناورین به رامنځته شي.

دغه راز خلک هم د پاکستان له مرستو هرکلی کوي او له نړیوالې ټولنې غواړي، چې افغانستان ته نورې مرستې هم راولېږي.

له دې مخکې هم پاکستان اعلان کړی و، چې په افغانستان کې د بشري وضعیت د حل لپاره به پېنځه میلیارډ پاکستانۍ کلدارې مرسته کوي.