تازه خبرونه
د پاکستان لومړی وزیر به روانه اوونۍ مسکو ته سفر وکړي
اسلام آباد تېره ورځ په ډاګه کړې، چې د پاکستان لومړی وزیر عمران خان به روانه اوونۍ په مسکو کې د روسیې له ولسمشر ولادمیر پوتین سره وګوري.
د پاکستان د لومړي وزیر دغه دوه ورځنی سفر، چې چارشنبې پر ورځ پیلیږي؛ د اوکراین له روان کړکیچه مخکې پلان شوی و.
د پاکستان د بهرنیو چارو وزارت په ډاګه کړې؛ د سرمشریزې په بهیر کې به دواړه مشران د انرژۍ په اړه د همکارۍ په ګډون پر دوه اړخیزو اړیکو بیا کتنه وکړي.
د سرچینې د څرګندونو له مخې؛ پوتین او عمران خان به د افغانستان د وضعیت پر اړوند مسایلو هم خبرې وکړي.
د پاکستان او روسیې اړیکې په تېرو څو لسیزو کې پر نشت حساب شوي؛ ځکه، چې اسلام آباد د سړې جګړې پر مهال له امریکا ملاتړ وکړ او په ۲۰۰۱ زېږدیز کال کې پر افغانستان د امریکایي ځواکونو له برید سره سم واشنګټن د ناټو د لوی متحد دریځ وروباښه.
په تېرو څو کلونو کې د امریکا او پاکستان اړیکې د افغانستان له سیاسي شرایطو سره بدلې او د مسکو او اسلام آباد ترمنځ د اړیکو هیلې راوټوکېدې، چې د ګازو او انرژۍ په برخو کې د پروژو د طرحې په اړه یې همغږي ښکاره بېلګه ده.
عمران خان د دوشنبې پر ورځ په یوه خپره شوې مرکه کې د دې سفر نېټه په ډاګه کړه او له غرب سره د دې سفر اغېزو ته یې ډېر اهمیت ورنکړ.
هغه د پاکستان نیوزویک ته ویلي: دا سفر د اوکراین د اوسني کړکیچ له راڅرګندیدو مخکې پلان شوی و… ما د ولسمشر پوتین بلنه ډېره ژر ترلاسه کړه.
د یادونې ده، چې دا په تېرو دوه لسیزو کې مسکو ته د یوه پاکستاني مشر لومړی سفر دی.