د کونړ قومي مشرانو له پاكستان سره د مخامخ خبروغوښتنه وكړه

د کونړ سرحدي ولسواليو قومونو په يوه غونډه کې دوه پلاوي ټاکلي، چې له دولت او پاکستان پوځ سره د توغندويي بريدونو د مخنوي په موخه مخامخ خبرې وکړي.

دوى گولښ کړى:

که پاکستاني ځواکونه بيا هم خپلو بريدونو ته دوام ورکړي؛ نو د قومونو له مقاومت سره به مخ شي.

د کونړ والي سيدفضل الله وحيدي وايي:

پاکستاني ځواکونو يو وار بيا پر دانگام ولسوالى اووه توغندي توغولي، چې خلکوته يې مالي زيان اړولى دى.

د آريانا راډيو –ټلويزيون خبريال همايون حبيبي په ډاگه كړې، چې:

د کونړ سرحدي ولسواليو قومونو دوه پلاوي ټاکلي، چې يو پلاوې به يې په سرحدي سيمو کې د پاکستان پوځ له چارواکو سره مخامخ خبرې وکړي او دوه يم پلاوې به د ولسمشر حامدکرزي سره په کتنه کې د خپلو هغو وسلو غوښتنه وکړي، چې نړيوالو ځواکونو له خلکو په يوه او بل نامه ټولې کړي.

د قومونو استازي ډگروال شاه محمود  فومي گواښ څرگند كړ او وايي، چې:

كه پاکستاني ځواکونه بيا هم خپلو بريدونو ته دوام ورکړي؛ نو د قومونو له جدي غبرگون سره به مخ شي.

دکونړوالي سيدفضل الله وحيدي وايي :

که دا ستونزه د خبرو له لارې حل نه شي؛ نو دوى به د پاکستاني ځواکونو هغه مرکزونه په نخښه کړي، چې ترې بريدونه کيږي.

دغه څرگندونې د کونړ ولسونه او چارواکي په داسې مهال كې کوي، چې نړيوالو ځواکونو هم سيمې ته د پلاوي د استولو خبره کړې. هغو هم غواړي معلومه کړي، چې دغه بريدونه د چا لخوا ترسره کيږي.

د کونړ چارواکي ټينگار کوي، چې د افغانستان پر خاوره د پاکستاني ځواکونو له مرکزونو  توغندويي بريدونه ترسره کيږي.