سوداگري
د یوې، دوه او پېنځه افغانیو کاغذي پیسې د چلند وړ دي
د افغانستان بانک چارواکو څرګنده کړې؛ په پام کې ده، چې نن (چهارشنبه) به د ۱، ۲ او ۵ افغانیو بانکنوتونه بازار ته وړاندې شي.
د چارشنبې پر ورځ د بلخ ولایت د رسنیو له مرکز څخه په خپره شوې خبرپاڼه کې راغلي؛ د افغانستان بانک د شمال زون آمر ضیا الرحمن مدني ویلي، چې د پخوا په څېر د ۱، ۲ او ۵ افغانیو بانکنوتونه د چلند وړ دي او هېوادوال کولی شي په راکړه ورکړه کې یې د عادي حالت په توګه وکاروي.
هغه ويلي، پخواني حکومت د شخصي ګټو لپاره دغه بانکنوتونه له چلنده وویستل؛ خو اوس ياده ستونزه اواره شوې او اړوند کاغذي پیسې د چلند وړ دي.
د نوموړي د څرګندونو له مخې؛ دا مهال د افغانستان بانک په خزانه کې شاوخوا یو میلیون اړوند افغانۍ شته، چې نن (چارشنبه) به بانکونو او بازارونو ته ووېشل شي.