د تخار ولایت امنیه قومندانۍ ویلي، چې د رستاق ولسوالۍ پولیسو د خلکو د راپور او پر وخت اقدام په پایله کې یوه ښځه او د هغې ماشوم له کلونو ځانګړي بند څخه ژغورلي دي.

د امنیه قومندانۍ د څرګندونو له مخې، دا ښځه شاوخوا اووه کاله مخکې د خپل مېړه له‌خوا د رستاق ولسوالۍ د بیشکند کلي په یوه ورانه ودانۍ کې، چې د څارويو د ساتنې لپاره کارېده؛ ناقانونه بندي شوې وه. د هغې ماشوم هم څو کاله وړاندې د همدې کس له‌خوا د خپلې مور ترڅنګ په هماغه ځای کې بندي شوی و.

چارواکي وایي، له ژغورنې وروسته ښځه او ماشوم د درملنې او اړینو روغتیايي پاملرنو لپاره د رستاق ولسوالۍ روغتون ته لېږدول شوي دي.

د تخار امنیه قومندانۍ زیاته کړې، چې د دې پېښې په تړاو یو شکمن کس نیول شوی او دوسیه یې د رستاق ولسوالۍ د کشفي او څېړنیزو ارګانونو تر هر اړخیزو پلټنو لاندې ده.

یادې قومندانۍ له قربانیانو سره خواخوږي څرګنده کړې او ټینګار یې کړی، چې د عدالت د خوندیتوب، د هېوادوالو د حقونو د خوندي کولو او ټولو جرمي قضیو د جدي څېړنې لپاره به لازم اقدامات وکړي.

امنیتي چارواکو د تخار ولایت له اوسېدونکو غوښتي؛ که ورته پېښې وویني، ژر تر ژره یې له امنیتي ارګانونو سره شریکې کړي، چې د دې ډول بې‌عدالتۍ او ظلم مخه ونیول شي.

د امر بالمعروف، نهی عن المنکر او شکایتونو اورېدلو وزیر محمد خالد حنفي په هرات ولایت کې د لویدیځو ولایتونو له دیني عالمانو، قومي مخورو، متنفذینو او د رسنیو له استازو سره په ناسته کې د شریعت پر بشپړ تطبیق، د اسلامي نظام پر پیاوړتیا او د خلکو پر دیني او ټولنیزو مسوولیتونو ټینګار وکړ.

نوموړي ویلي؛ د اسلامي نظام معنا دا ده، چې شریعت په بشپړ ډول تطبیق شي، له مظلوم څخه دفاع وشي، عدالت ټینګ شي او خلک پر دین برابر وروزل شي.

هغه زیاته کړې، د امر بالمعروف او نهی عن المنکر قانون د کوم وزارت یا نظام قانون نه، بلکې د الله تعالی او د هغه د رسول صلی الله علیه وسلم قانون دی او د هغه پلي کول یوازې د وزارت او محتسبانو دنده نه، بلکې د هر مسلمان ګډ مسوولیت دی.

د امر بالمعروف وزیر دیني عالمانو ته په خطاب کې څرګنده کړې، منبر د دعوت، اصلاح او بدلون ځای دی او علما مسوولیت لري، چې د همدې لارې ټولنې ته د حق لار وښيي او خلک اصلاح کړي.

هغه وایي، چې د ټولنې اصلاح هغه مهال رامنځته کېږي، چې له منبره د حق غږ پورته شي.

محمد خالد حنفي ویلي: هغو کسانو، چې پخوا یې د بهرنیانو پر ملاتړ پر ښځو او بې‌ګناه خلکو ظلمونه کول؛ نن د ښځو د حقونو خبرې کوي. حال دا، چې اسلامي نظام د شریعت په چوکاټ کې د ښځو د حقونو او کرامت تر ټولو ښه ساتونکی دی.

هغه زیاته کړې، په نړۍ کې داسې کسان شته، چې په فساد، ظلم او د انساني ارزښتونو خلاف کړنو ویاړي؛ خو دیني عالمان باید پر دې وویاړي، چې د الهي احکامو د پلي کېدا زمینه برابره شوې او د دیني ارزښتونو د ټینګښت لپاره ترې همکاري غوښتل کېږي.

د امر بالمعروف وزیر وایي، چې د دې وزارت د قانون هره ماده د شریعت پر بنسټ جوړه شوې او موخه یې د هېوادوالو د حقونو خوندي کول دي.

د هغه د څرګندونو له مخې: هغه نړیوال، چې د وزارت پر کړنو نیوکې کوي او د مخنیوي هڅه یې کوي؛ په حقیقت کې له دیني احکامو سره ستونزه لري.

هغه د رسنیو له مسوولینو هم وغوښتل، چې د امر بالمعروف او نهی عن المنکر قانون لومړی پر ځان او خپلو همکارانو عملي کړي او بیا یې د خپلو رسنیو له لارې خلکو ته ورسوي.

نوموړي زیاته کړې، رسنۍ په اوسني وخت کې د منبر رول ترسره کوي او په دې برخه کې خپل مسوولیت باید ادا کړي.

مولوي محمد خالد حنفي همداراز څرګندوي: هغه کسان، چې د امریکا ترڅنګ یې د مسلمانو ښځو او میندو د بمبارډ، لوټ او بې‌عزتۍ ملاتړ کاوه؛ نن د شریعت د پلي کېدو په اړه د ښځو د حقونو خبره کوي. حال دا، چې اسلام د بشري حقونو اصلي او غوره مرجع ده.

هغه د هغو راپورونو په غبرګون کې، چې ګواکې د امر بالمعروف محتسبان په هرات کې ښځې بندیانوي وویل؛ استخباراتي کړۍ د افواهاتو پر خپرولو د عامه ذهنونو د مغشوشولو هڅه کوي.

نوموړي له دیني عالمانو، قومي مخورو او د رسنیو له استازو وپوښتل، چې آیا دوی په خپله داسې کومه پېښه لیدلې ده؟ هغه زیاته کړې، چې دا ډول تبلیغات د مخالفانو بې‌دلیله ادعاوې دي او له حقیقت سره تړاو نه‌لري.

د اسلامي همکارۍ ټولنې او د اسلامي نړۍ د پیوستون ټولنې لوړپوړو چارواکو د همکاریو د پیاوړتیا او له افغانستان څخه د ملاتړ پر لارو چارو خبرې کړې دي.

دا لیدنه د شنبې پر ورځ د اسلامي همکارۍ ټولنې د سرمنشي مرستیال طارق علي بخیت او د اسلامي نړۍ د پیوستون ټولنې د سرمنشي محمد بن عبدالکریم العیسی ترمنځ په اسلام‌آباد کې د ښځو په اړه د اسلامي همکارۍ ټولنې د نهمې غونډې په څنډه کې ترسره شوې ده.

د اسلامي همکارۍ ټولنې د خبرپاڼې له مخې دواړو لوریو د دوه اړخیزو همکاریو د پراختیا فرصتونه وڅېړل او هوکړه وشوه، چې د اسلامي امت د چارو د خدمت او د همکاریو د پراختیا لپاره څو ګډ پروګرامونه پیل کړي.

دواړو لورو د افغانستان د وروستیو بدلونونو په اړه هم د نظرونو تبادله وکړه او له بشري او پراختیايي ننګونو څخه د افغانستان د خلکو د ملاتړ پر لارو چارو یې خبرې وکړې.

هغوی ټینګار کړی، چې اسلامي هېوادونه او نړیواله ټولنه باید پر همغږۍ اړینې مرستې برابرې او د بشري مرستو او مرستندویو پروګرامونو ساتل یقیني کړي.

د لیدنې په پای کې طارق علي بخیت د اسلامي نړۍ د پیوستون ټولنې له هغو هڅو ستاینه وکړه، چې د اعتدال او منځلاریتوب د ارزښتونو د دودولو او د اسلامي امت د چارو د خدمت لپاره یې ترسره کوي.