سیمه ییز خبرونه
روسيه او هند د ترهگرۍ په وړاندې له گډو هڅو خبر وركوي
د پنجشنبې په ورځ(د تلې ۱۱) د هند او روسيې د بهرنيو چارو د وزيرانو خبرې د افغانستان پر موضوعاتو را وڅرخيدې. دغه دوه هېوادونه اوس هم اندېښنه لري، چې د ۲۰۱۴ م كال په پاى كې له افغانستان څخه د بهرنيو ځواكونو له وتلو وروسته به په دغه هېواد كې د ناامنيو لمن پراخه شي .
د روسيې د بهرنيو چارو وزير سرگې لاوروف وايي:
مونږ په راتلونكي كې د افغانستان د امنيت په باب اندېښنه لرو او همدا راز دا اندېښنه هم را سره ده، چې ناامنۍ به د روسيې پولې ته را ورسيږي. مونږ له خپلو هندي ملگرو سره په هغږى كې يو، چې په افغانستان كې پر پېښيدونكيو پېښو له نږدې خبرې وكړو ، په ځانگړي توگه د ۲۰۱۴م كال په پاى كې، چې له افغانستان څخه بهرني ځواكونه وځي.
د هند د بهرنيو چارو وزير سلمان خورشيد له خپل روسيې سيال سره په يوه گډه خبري غونډه كې وويل، چې:
مونږ د افغانستان د بدلونونو او د ترهگرۍ د گواښ په اړه، چې نه يوازې د افغانستان؛ بلكې د سيمې او نړۍ امنيت ته گواښ دى، خبر اترې وكړې.
د دوى په وينا، هند او روسيه به له افغانستان سره خپلو مرستو ته دوام وركړي، چې افغانستان په باثباته او له ترهگرۍ څخه پر پاك هېواد بدل شي.