تازه خبرونه
روسیې په کابل کې د پرونۍ چاودنې په اړه د پوره څېړنې غوښتنه وکړه
روسیې نن (چهارشنبه د لیندۍ ۱۲) له افغان حکومت وغوښتل؛ په کابل کې دې د پرونۍ چاودنې په اړه بشپړه څېړنه وکړي، چې په کې د روسیې د سفارت څلور کارمندان لږ څه ټپیان شوي دي.
د روسیې د بهرنیو چارو وزارت ویاندې ماریا زخاروا له افغانستان څخه وغوښتل، چې د اړوند پېښې په اړه پوره څېړنه وکړي او په دې هېواد کې د روسیې د سفارت د کارمندانو د امنیت د تامین لپاره خپلې ټولې لازمې هڅې تر سره کړي.
دا په داسې حال کې ده، چې تېره ورځ په کابل کې د روسیې سفارت یو شمېر کارمندان په یوه بمي چاودنه کې ټپیان شوي دي.
زخاروا په ډاګه کړې، چې تېره ورځ د دسمبر پر لومړۍ نېټه په کابل کې د روسیې سفارت د کارمندانو موتر ته نږدې د سړک غاړې ماین چاودنې روسي ډیپلوماټان لږ څه ټپي کړي دي.
هغې زیاته کړې؛ روسي ډیپلوماټان نېغ په نېغه پر نښه شوي ندي؛ خو دا اوس څرګنده نده، چې هدف څوک و.
د روسیې د سفارت کارمندانو ویلي؛ لومړنۍ پلټنې ښیې، چې د برید موخه د افغان امنیتي ځواکونو یو موټر و.
هغې ویلي، چې په کابل کې د روسیې سفارت د خپلو کارمندانو د امنیت خوندیتوب ته بشپړې لازمې هڅې کړې دي.