مهم خبرونه
سمرقند د ۲۰۲۳ زېږدیز کال د ګرځندوی پلازمېنه یاده شوه
د ازبکستان ګرځندوی او سپورټ وزارت په ډاګه کړی، چې د ملګرو ملتونو د نړیوال ګرځندوی سازمان په ۲۴ عمومي غونډه کې د سمرقند تاریخي ښار د ۲۰۲۳ زېږدیز کال د ګرځندوی پلازمېنه یاده شوې ده.
د هسپانیا په پلازمېنه مادریډ کې د ملګرو ملتونو عمومي غونډ ته د ازبکستان د ګرځندوی او سپورټ وزیر او د ازبکستان د لومړي وزیر مرستیال عزیز عبدالخاکیموف په مشرۍ یو ازبک پلاوی هم ورغلی و.
دغه وزارت څرګنده کړې؛ سمرقند به د لومړي ځل لپاره د ګرځندوی د نړیوال سازمان د ۲۵عمومي غونډې کوربه وي.
دغه راز ویل شوي، چې ازبکستان به د لومړي ځل لپاره د ملګرو ملتونو د دغه دفتر کوربتوب کوي او دا د دې هېواد سیاستونو او هڅو پایله ده، چې په هېواد کې ګرځندوی ته وده ورکړي.