سیمه ییز خبرونه
سږکال به د پاکستان اقتصادي وده صفر اعشاریه ۵ وي – نړیوال وجهي صندوق
د اسوشیتید پرس د څرګندونو له مخې؛ د پیسو نړیوال صندوق وړاندویېنه کړې، چې د پاکستان مخ پر ځوړ اقتصاد به سږ کال یوازې صفر اعشاریه ۵ سلنه وده ولري.
د پاکستان اقتصاد په ۲۰۲۲ ز. کال کې شپږ سلنه وده کړې ده.
په راپور کې دا هم راغلي، چې د پاکستان د اقتصاد په اړه د پیسو نړیوال صندوق دغه راپور پرون (چارشنبه د وري ۲۳ ) خپور شوی دی.
د دغه راپور له مخې؛ په ۲۰۲۳ ز. کال کې د پاکستان لپاره د ۲۷ سلنې انفلاسیون وړاندویېنه شوې او څرګنده شوې، چې د بېکارۍ کچه به هم ورسره لوړه شي.
پاکستان د تېر کال د اوړي د سېلابونو له کبله ۳۰ میلیارد دالره زیانمن شوی او د خپلو پورونو د نه ادا کولو د مخنیوي هڅې کوي.
د یادونې ده، چې د پاکستان په دغو سېلابونو کې له ۱۷۰۰ ډېر کسان مړه شوي هم دي.