تازه خبرونه
شکریه بارکزۍ په انتخاباتي نظام کې د بنیادي اصلاحاتو د ځانګړي کمیسیون مشره وټاکل شوه
د ولسي جرګې غړې او سیاستواله شکریه بارکزۍ په انتخاباتي نظام کې د بنیادي اصلاحاتو د ځانګړي کمیسیون مشره وټاکل شوه.
د ولسمشر محمد اشرف غني په یوه فرمان کې ویل شوي چې د شکریې بارکزۍ په مشرۍ دا ځانګړی کمیسیون دنده لري چې د هیواد په ټاکنیز نظام کې د بینادي اصلاحاتو د راوستلو، د ولسواک نظام د پیاوړتیا، پر دولتي بنسټونو د ولس د باور د پیداکولو، د قانون د حاکمیت د ټینګښت او د ټاکنیزو سرغړونو د مخنیوي لپاره هلې ځلې وکړي.
د کمیسیون اصلي غړي د ولسمشر او اجرايي رييس پلویان ښکاري.
په دغه کمیسیون کې صدیق الله توحیدي د مرستیال، علي امیري، عبدالقدیر کریاب، فاروق بشر، ډاکټر محمد امین احمدي، فیض الله ذکي، کاوون کاکړ، صبرینا ثاقب، ګل احمد مددزی، عزیزالله رفیعي، د عدلیې وزارت استازی عبدالمجید غني زاده، د ملګرو ملتونو استازی تادامیچي یاماموتو د غړو، شاه سلطان عاکفي او وږمه فروغ د منشیانو او غړو په توګه ټاکل شوي دي.
کمیسیون موظف کړای شوی دی چې خپل فعالیتونه د دندو د لایحې له مخې چې له دغه فرمان سره ضمیمه دی، تنظیم کړي.